مصحفی غلام ہمدانی

جاتے جاتے راہ میں اس نے منہ سے اٹھایا جوں ہی پردا
راہ کے جانے والوں نے بھی منہ اس کا پھر پھر کے دیکھا

باقی صدیقی

وہ مقام دل وہ جاں کیا ہو گا
تو جہاں آخری پردا ہو گا
بات لب پر بھی نہیں آ سکتی
اور تجھ سے کوئی پردا بھی نہیں
خونِ دل حاصل نظارہ ہے
نگہ شوق کو پردا کہیے
زندگی آپ نشاں تھی اپنا
تھا نہ رنگین یہ پردا پہلے

جون ایلیا

انبار اس کا پردۂ حرمت بنا میاں
دیوار تک نہیں گری پردا کیے بغیر

خواجہ میر درد

حجاب رخِ یار تھے آپ ہی ہم
کھلی آنکھ جب کوئی پردا نہ دیکھا

مجید امجد

امجد، قبائے شہ تھی کہ چولا فقیر کا
ہر بھیس میں ضمیر کا پردا لباس تھا

اسرار الحق مجاز

خود دل میں رہ کے آنکھ سے پردا کرے کوئی
ہاں لطف جب ہے پا کے بھی ڈھونڈا کرے کوئی
عشق نے آنکھ جھکا لی ورنہ
حسن اور حسن کا پردا کیا تھا

جلیل مانک پوری

تابِ نظارہ ان آنکھوں کو کہاں
دیکھنے والوں سے پردا چاہیے

حسرت موہانی

نگاہیں عاشقوں کی تھی ہوس کار
وہ کیا کرتے اگر پردا نہ کرتے

سیماب اکبر آبادی

بے پردہ بے تعین و بے نام دیکھ اسے
وہ تو ہے صرف نام کا پردا لیے ہوئے

شاد عظیم آبادی

دیدۂ شوق سے بے وجہ ہے پردا تیرا
کس نے دیکھا نہیں ان آنکھوں سے جلوا تیرا
خود نزاکت پہ نہ کیوں بوجھ ہو پردا تیرا
کیا کسی آنکھ نے دیکھا نہیں جلوا تیرا
بے سبب میری خموشی نہیں اے شاہد حسن
دامنِ صبر سے ڈھنکتا نہیں پردا تیرا

عزیز حامد مدنی

کہہ سکتے تو احوال جہاں تم سے ہی کہتے
تم سے تو کسی بات کا پردا بھی نہیں تھا

فانی بدایونی

شوقِ نظارہ سلامت ہے تو دیکھا جائے گا
ان کو پردہ ہی اگر منظور ہے پردا کریں
وہ جلوہ بے حجاب سہی ضد کا کیا علاج
جب دل میں رہ کے آنکھ سے پردا کرے کوئی
وہ تو میرے سامنے تھے دیکھنے کی دیر تھی
میں نے آنکھیں بند کر لیں ورنہ پردا کچھ نہ تھا

شاذ تمکنت

سامنا ہو تو وہی بوجھ سا جیسے دل پر
تم سے مانا کہ کسی بات کا پردا بھی نہیں

فراق گورکھپوری

عدم کا راز صدائے شکست ساز حیات
حجاب زیست بھی کتنا لطیف پردا تھا
صاف الگ ہم کو جنون عاشقی نے کر دیا
خود کو تیرے درد کا پردا سمجھ بیٹھے تھے ہم