مصحفی غلام ہمدانی

مری کیوں کہ ہو تسلی تو ہی مصحفیؔ بتا پھر
دل شب بھی اس صنم کی جو گلی کو میں نہ دیکھوں

مومن خان مومن

ان ناتوانیوں پہ بھی تھے خارِ راہِ غیر
کیوں کر نکالے جاتے نہ اس کی گلی سے ہم

جون ایلیا

جائیے اور خاک اڑائیے آپ
اب وہ گھر کیا کہ وہ گلی ہی نہیں
جانے والوں سے پوچھنا یہ صبا
رہے آباد دل گلی کب تک
اس کی گلی سے اٹھ کے میں آن پڑا تھا اپنے گھر
ایک گلی کی بات تھی اور گلی گلی گئی
بستیو اب تو راستہ دے دو
اب تو میں اس گلی کو بھول گیا
اے طراحدار عشوہ طراز دیارِ ناز
رخصت ہوا ہوں تیرے لیے دل گلی سے میں
بدل گیا سبھی کچھ اس دیار بودش میں
گلی تھی جو تری جاں وہ تری گلی ہی رہی

عرفان صدیقی

چلی تھی خاک بھی میری وہیں بکھرنے کو
ہوا نے رقص کیا اس گلی میں پہلے سے

ادا جعفری

رستہ جسے مل جائے یہ توفیق ہے اس کی
پلٹا نہیں اب تک ہے کوئی تیری گلی سے

علی سردار جعفری

بوئے خوں آتی ہے ملتا ہے بہاروں کا سراغ
جانے کس شوخ ستم گر کی گلی ہے یارو

ماجد صدیقی

جسم مہکا ہے پھر کوئی ماجدؔ
ہے پریشاں گلی گلی خوشبو

اختر ہوشیارپوری

تھی تتلیوں کے تعاقب میں زندگی میری
وہ شہر کیا ہوا جس کی تھی ہر گلی میری
ٹوٹے ہوئے مکاں ہیں مگر چاند سے مکیں
اس شہر آرزو میں اک ایسی گلی بھی ہے

احمد فراز

تو بضد ہے تو جا فراز مگر
واپسی اس گلی سے مشکل ہے

شاذ تمکنت

وہیں کل وقت نے کھائی تھی ٹھوکر یاد ہے اب تک
وہ پیچ و خم جہاں تیری گلی تقسیم ہوتی ہے

قتیل شفائی

نئے اک شہر کو صبح سفر کیا لے چلی مجھ کو
صدائیں دے رہی ہے ایک چھوٹی سی گلی مجھ کو

ناصر کاظمی

چاندنی اور دھوئیں کے سوا دور تک کچھ نہیں
سو گئی شہر کی ہر گلی سو رہو سو رہو
وہیں پھرتا ہوں میں بھی خاک بسر
اس بھرے شہر میں ہے ایک گلی
تو ہے اور بے خواب دریچے
میں ہوں اور سنسان گلی ہے
سو گئی شہر کی ہر ایک گلی
اب تو آ جا کہ رات بھیگ چلی

نوح ناروی

میں کسی شوخ کی گلی میں نہیں
زندگی میری زندگی میں نہیں