مصطفٰیٰ خان شیفتہ

ہے وہ آتش جلوہ، اشک افشاں ہمارے شور سے
شمعِ رو دیتی ہے پروانے کو جلتا دیکھ کر

باقی صدیقی

پ تو اکبات کہہ کر چل دیے
رات بھر بستر مرا جلتا رہا
زندگی کی آس بھی کیا آس ہے
موجِ دریا پر دیا جلتا رہا
وہ اندھیر کے طور کیا جانے
جس کے گھر میں چراغ جلتا ہو

عرفان صدیقی

چراغِ بام تھا اپنی بساط تھی معلوم
سو رائیگاں کسی طاقِ ابد میں جلتا کیا
دل اک تپش میں پگھلتا رہے تو اچھا ہے
چراغ طاق میں جلتا رہے تو اچھا ہے

رئیس فروغؔ

صبا بھی ہے ہم بھی گلی میں تری
مسافر مسافر سے جلتا نہیں

بشیر بدر

تمہارے شہر کے سارے دیے تو سو گئے کب کے
ہوا سے پوچھنا دہلیز پہ یہ کون جلتا ہے

عالم تاب تشنہ

ہمارے دم سے بھی ہے موسموں کی گلکاری
چراغ لالہ میں دل کا لہو بھی جلتا ہے
ہوائے دامن رنگیں یہ کہہ گئی تشنہؔ
ہمارے سامنے کس کا چراغ جلتا ہے

رسا چغتائی

جب بھی تیری یادوں کا سلسلہ سا چلتا ہے
اک چراغ بجھتا ہے اک چراغ جلتا ہے

اختر ہوشیارپوری

آج تک موج ہوا تو لوٹ کر آئی نہیں
کیا کسی اجڑے نگر میں دیپ جلتا رہ گیا
حرف بے آواز سے دہکا ہوا
اک دیا ہوں طاق میں جلتا ہوا

محسن احسان

ابھی سچ کا دیا جلتا کہاں ہے
ہوا کا رخ ابھی بدلا کہاں ہے

ناصر کاظمی

میرے ہاتھ بھی سلگ رہے تھے
تیرا ماتھا بھی جلتا تھا
دیواروں سے آنچ آتی تھی
مٹکوں میں پانی جلتا تھا
تنہائی کے آتشداں میں
میں لکڑی کی طرح جلتا تھا
کالے منہ پر پیلا ٹیکا
انگارے کی طرح جلتا تھا
چاند ابھی تھک کر سویا تھا
تاروں کا جنگل جلتا تھا
ترے آنے کا دھوکا سا رہا ہے
دیا سا رات بھر جلتا رہا ہے