مرزا غالب

لازم تھا کہ دیکھو مرا رستہ کوئی دن اور
تنہا گئے کیوں؟ اب رہو تنہا کوئی دن اور

باقی صدیقی

بھیڑ میں کھو گئے آخر ہم بھی
نہ ملا جب کوئی رستہ ہم کو
کیا ملا انجمن آرائی سے
کیسے تنہائی سے رستہ مانگیں
دوستی خونِ جگر چاہتی ہے
کام مشکل ہے تو رستہ دیکھو
یوں کبھی تھک کے نہ ہم بیٹھے تھے
گرچہ دشوار تھا رستہ پہلے

عرفان صدیقی

پھول چہروں سے بھی پیارے تو نہیں ہیں جنگل
شام ہو جائے تو بستی ہی کا رستہ اچھا
رفاقتوں کو ذرا سوچنے کا موقع دو
کہ اس کے بعد گھنے جنگلوں کا رستہ ہے
پیروں میں ہے زنجیر کیوں، ہے خاک دامن گیر کیوں
رخصت بھی ہے ، مہلت بھی ہے ، ناقہ بھی ہے ، رستہ بھی ہے

جمال احسانی

عمر گزری جس کا رستہ دیکھتے
آ بھی جاتا وہ تو ہم کیا دیکھتے

رئیس فروغؔ

دھوپ مسافر چھاؤں مسافر آئے کوئی کوئی جائے
گھر میں بیٹھا سوچ رہا ہوں آنگن ہے یا رستہ ہے

اکبر معصوم

نہ اپنا نام نہ چہرہ بدل کے آیا ہوں
کہ اب کی بار میں رستہ بدل کے آیا ہوں

عالم تاب تشنہ

وہ رقیبوں کا پتہ پوچھنے آئے مرے گھر
کوئی تو ان سے ملاقات کا رستہ نکلا

غلام محمد قاصر

شام ابد تک ٹکرانے کا اذن نہیں ہے دونوں کو
چاند اسی پر گرمِ سفر ہے جو سورج کا رستہ ہے
ہے شوقِ سفر ایسا اک عمر سے یاروں نے
منزل بھی نہیں پائی رستہ بھی نہیں بدلا

رسا چغتائی

ملے تھے کب جو ہم اب پھر ملیں گے
ہمارا آپ کا رستہ الگ ہے

اختر ہوشیارپوری

اس کی گلی کے موڑ سے گزرے کیا تھے
سب راہی رستہ رستہ ایک ہوئے

محسن احسان

کھلی آنکھوں سے سپنا دیکھنے میں
گنوا دی عمر رستہ دیکھنے میں
عذاب گمرہی میں مبتلا ہیں
بھٹک جاتے ہیں رستہ دیکھنے میں

ناصر کاظمی

تیرے ساتھ ترے ہمراہی
میرے ساتھ مرا رستہ تھا
فرصتِ شوق بن گئی دیوار
اب کہیں بھاگنے کا رستہ نہیں
تو جیون کی بھری گلی
میں جنگل کا رستہ ہوں