مرزا غالب

نقشِ فریادی ہے کس کی شوخی تحریر کا
کاغذی ہے پیرہن ہر پیکرِ تصویر کا
پکڑے جاتے ہیں فرشتوں کے لکھے پر ناحق
آدمی کوئی ہمارا دمِ تحریر بھی تھا؟

امام بخش ناسخ

جب جدائی کے مضامین مجھے سوجھے ہیں
حرف سے حرف ہوا ہے دمِ تحریر جدا

بہادر شاہ ظفر

پان کھا کر سرمہ کی تحریر پھر کھینچی تو کیا
جب مرا خوں ہو چکا شمشیر پھر کھینچی تو کیا

شیخ ابراہیم ذوق

تمام اہلِ سخن بزمِ سخن میں ذوقؔ حیراں ہیں
ملا جو قافیہ تو نے کیا تحریر پہلو سے

مصحفی غلام ہمدانی

کوئی لے جائے اسے یا کہ نہ لے جائے پہ میں
نامۂ شوق کی تحریر کیے جاتا ہوں
شاید کہ پڑھ کے نرم ہو دل اس کا مصحفیؔ
جا کر حوالے اس کے یہ تحریر وصل کر

مصطفٰی خان شیفتہ

رہتے تھے بہم جن سے مثالِ ورق و حرف
اب ان کی رہا کرتے ہیں تحریر کے مشتاق

یگانہ چنگیزی

واہ کیا کہنا مجسم کر دیا موہوم کو
نقش بندان ازل کی شوخی تحریر نے
دل سے بہت شکایتیں کرتے ہو یار کی
دیکھو قلم سے کچھ کبھی تحریر ہو نہ جائے

عبدالحمید عدم

ہجوم حشر میں کھولوں‌ گا عدل کا دفتر
ابھی تو فیصلے تحریر کر رہا ہوں میں

قمر جلالوی

وہ میرا نام لکھتے وقت روئے ہوں گے اے قاصد
یہاں آنسو گرے ہوں گے جہاں تحریر بگڑی ہے

عرفان صدیقی

دروازوں پر دن بھر کی تھکن تحریر ہوئی
مرے شہر کی شب ہر چوکھٹ کی زنجیر ہوئی

عبید اللہ علیم

اس لفظ کی مانند جو کھلتا ہی چلا جائے
یہ ذات و زماں مجھ سے ہی تحریر ہوئے سب

غلام محمد قاصر

صحرائے تمنا میں جس کے جینے کا جواز ہی جھونکے ہوں
اس ریت کے ذروں نے مل کر اک نام کیا تحریر تو کیا
آنکھ سے بچھڑے کاجل کو تحریر بنانے والے
مشکل میں پڑ جائیں گے تصویر بنانے والے
عہد سے کون مکر جائے گا تاروں کو کیا علم
لکھی نہیں جو تو نے اس تحریر سے پوچھتے ہیں

ماجد صدیقی

کس کا یہ سندیس آنکھوں میں مری لہرا گیا
صفحۂ بادِ صبا پر عکس ہے تحریر کا

حسرت موہانی

سیکھی تھی جو آغازِ محبت میں قلم نے
باقی ہے وہ رنگینی تحریر ابھی تک

شان الحق حقی

اک مہک سی دمِ تحریر کہاں سے آئی
نام میں تیرے یہ تاثیر کہاں سے آئی

شکیل بدایونی

پہلے قاصد کی نظر دیکھ کے دل سہم گیا
پھر تری سرخی تحریر پہ رونا آیا

اختر ہوشیارپوری

خواہشیں خون میں اتری ہیں صحیفوں کی طرح
ان کتابوں میں ترے ہاتھ کی تحریر بھی ہے

احمد فراز

جانے کس عالم میں تو بچھڑا کہ ہے تیرے بغیر
آج تک ہر نقش، فریادی مری تحریر کا

قتیل شفائی

ایک عنواں میں سمٹ آئیں گے سو نام قتیلؔ
داستاں جب کوئی تحریر ہماری ہو گی

کیف بھوپالی

اس نے یہ کہہ کر پھیر دیا خط
خون سے کیوں تحریر نہیں ہے

محسن احسان

اے باد تر و تازہ مجھے غور سے پڑھ لے
قرطاس پذیرائی پہ تحریر ہوا میں