فیض احمد فیض

مشکل ہے اگر حالات وہاں، دل بیچ آئیں جاں دے آئیں
دل والو کوچہء جاناں میں‌کیا ایسے بھی حالات نہیں
شرح بے دردی حالات نہ ہونے پائی
اب کے بھی دل کی مدارات نہ ہونے پائی

باقی صدیقی

باقیؔ کسی سے ان کی شکایت نہ کر سکے
کچھ یوں بدل کے صورت حالات رہ گئی

عبدالحمید عدم

توبہ کا تکلف کون کرے حالات کی نیت ٹھیک نہیں
رحمت کا ارادہ بگڑا ہے برسات کی نیت ٹھیک نہیں
منقلب صورت حالات بھی ہو جاتی ہے
دن بھلے ہوں تو کرامات بھی ہو جاتی ہے

شکیب جلالی

اب میسر نہیں فرصت کے وہ دن رات ہمیں
لے اڑی جانے کہاں صرصرِ حالات ہمیں

رئیس فروغؔ

مکاں میں رہ کے مکینوں سے مل نہیں سکتے
عجیب صورت حالات ہے تمھارے لیے

زہرا نگاہ

سینوں میں سوز و سازِ محبت نہیں رہا
دنیا رہین گردشِ حالات ہو گئی

سدرشن فاکر

رونے والوں سے کہو ان کا بھی رونا رو لیں
جن کو مجبوری حالات نے رونے نہ دیا
کچھ تو دنیا کی عنایات نے دل توڑ دیا
اور کچھ تلخیِ حالات نے دل توڑ دیا

غلام محمد قاصر

کسے آباد سمجھوں کس کا شہرِ آشوب لکھوں میں
جہاں شہروں کی یکساں صورت حالات ہوتی ہے

احمد راہی

پڑ چکی ہیں اتنی گرہیں کچھ سمجھ آتا نہیں
کیسے سلجھائیں بھلا الجھے ہوئے حالات کو
ایک سے چہرے تو ہوتے ہیں کئی دنیا میں
ایک سی صورت حالات کہاں ہوتی ہے

ماجد صدیقی

اپنی خواہش، کہ گل پیرہن ہو چلیں
اور فضائے چمن، وقف حالات ہے

حسرت موہانی

ہم سے ہر چند وہ ظاہر میں خفا ہیں لیکن
کوشش پرسشِ حالات چلی جاتی ہے

سید ضمیر جعفری

خلاصہ یہ مرے حالات کا ہے
کہ اپنا سب سفر ہی رات کا ہے
کوئی شخص خوبی سے خالی نہیں
ہر اک شخص کے اپنے حالات ہیں

سیف الدین سیف

ہم کو تو گردشِ حالات پہ رونا آیا
رونے والے تجھے کس بات پہ رونا آیا
جی نہیں آپ سے کیا مجھ کو شکایت ہو گی
ہاں مجھے تلخیِ حالات پہ رونا آیا