یگانہ چنگیزی

باز آئے زندگی کے خواب رنگا رنگ سے
دست و پا گم کر دیے اندیشۂ تعبیر نے
دیتی ہے وحشتِ دل پھر مجھے تعبیر بہار
جلوہ گر خواب میں رہنے لگی تصویرِ بہار

عبدالحمید عدم

میں جانتا ہوں علامت ہے ضعف ہمت کی
جسے نصیب سے تعبیر کر رہا ہوں میں

عرفان صدیقی

اس تکلف سے نہ پوشاکِ بدن گیر میں آ
خواب کی طرح کبھی خواب کی تعبیر میں آ
آخرِ شب تمہیں آنکھوں کا بھرم کھونا تھا
اب کوئی خواب نہ تعبیر تمہارے لیے ہے

عبید اللہ علیم

اے راہِ عشق کے راہی سن چل ایسے سفر کی لذت میں
تری آنکھوں میں نئے خواب تو ہوں پر خوابوں کی تعبیر نہ ہو

غلام محمد قاصر

خوش ہوں کہ کسی کی محفل میں ارزاں تھی متاع بیداری
اب آنکھیں ہیں بے خواب تو کیا اب خواب ہیں بے تعبیر تو کیا
اس نے تو دیکھے ان دیکھے خواب سبھی لوٹائے
اور تھے شاید ٹوٹی ہوئی تعبیر بنانے والے
خواب کہاں سے ٹوٹا ہے تعبیر سے پوچھتے ہیں
قیدی سب کچھ بھول گیا زنجیر سے پوچھتے ہیں

ماجد صدیقی

ہم نے بھی اس شخص کو پایا تو تھا اپنے قریب
پر اثر دیکھا نہیں کچھ خواب کی تعبیر کا

خاطر غزنوی

مرا دل میرے جس پہلو میں رقصاں تھا اسی پہلو میں جنت تھی
یہ منظر چشمِ وا کے خواب کی تعبیر تھا کل شب جہاں میں تھا

شکیل بدایونی

کیا حسیں خواب محبت نے دکھایا تھا ہمیں
کھل گئی آنکھ تو تعبیر پہ رونا آیا

اختر ہوشیارپوری

میں نے جو خواب ابھی دیکھا نہیں ہے اخترؔ
میرا ہر خواب اسی خواب کی تعبیر بھی ہے

احمد فراز

رات کیا سوئے کہ باقی عمر کی نیند اڑ گئی
خواب کیا دیکھا کہ دھڑکا لگ گیا تعبیر کا
مسافرت میں بھی تصویر گھر کی دیکھتے ہیں
کوئی بھی خواب ہو تعبیر گھر کی دیکھتے ہیں

قتیل شفائی

عمر بھر آپ ہی دیکھیں گے کوئی خوابِ طرب
لیکن اس خواب کی تعبیر ہماری ہو گی

مجروح سلطان پوری

یہ ذرا دور پہ منزل یہ اجالا یہ سکوں
خواب کو دیکھ ابھی خواب کی تعبیر نہ دیکھ

محسن احسان

جو میں نے کبھی نیند میں دیکھا ہی نہیں تھا
دکھ یہ ہے کہ اس خواب کی تعبیر ہوا میں
مری نوا مری تدبیر تک نہیں پہنچی
یہ میرے خواب کی تعبیر تک نہیں پہنچی