مرزا غالب

نہ گلِ نغمہ ہوں نہ پردۂِ ساز
میں ہوں اپنی شکست کی آواز
محرم نہیں ہے تو ہی نوا ہائے راز کا
یاں ورنہ جو حجاب ہے ، پردہ ہے ساز کا
پیکرِ عشاق سازِ طالعِ نا ساز ہے
نالہ گویا گردشِ سیارہ کی آواز ہے

داغ دہلوی

ساز یہ کینہ ساز کیا جانیں
ناز والے نیاز کیا جانیں

شیخ ابراہیم ذوق

ناساز ہے جو ہم سے اسی سے یہ ساز ہے
کیا خوب دل ہے واہ ہمیں جس پہ ناز ہے
خانہ خرابیاں دلِ بیمار غم کی دیکھ
وہ ہی دوا خراب ہے جو خانہ ساز ہے

مصحفی غلام ہمدانی

ہیں ترے رمز تبسم کے ادا فہم جو شخص
جنبش لعل فسوں ساز میں مر جاتے ہیں
شبِ فرقت میں جز دم قلیاں
یار دم ساز کون ہے اپنا
غزل پڑھتے ہی میری یہ مغنی کی ہوئی حالت
کہ اس نے ساز مارا سر سے اور سر ساز سے مارا
جہاں تک ساز داری ہے لکھی دشمن کے طالع میں
ہمیں بد نام کر کے طالع نا ساز سے مارا
آساں نہیں ہے تنہا در اس کا باز کرنا
لازم ہے پاسباں سے اب ہم کو ساز کرنا

مومن خان مومن

رخنۂِ در سے غیر پاس دیکھا کسے کہ آج ہے
رخنہ گری کچھ اور ہی نالۂِ رخنہ ساز میں
چشمک مری وحشت پہ ہے کیا حضرتِ ناصح
طرز نگہ چشمِ فسوں ساز تو دیکھو

فیض احمد فیض

چنگ و نے رنگ پہ تھے اپنے لہو کے دم سے
دل نے لے بدلی تو مدھم ہوا ہر ساز کا رنگ

یگانہ چنگیزی

آنکھ دکھلانے لگا ہے وہ فسوں ساز مجھے
کہیں اب خاک نہ چھنوائے یہ انداز مجھے

باقی صدیقی

اڑ چلا وہ حسن صبح شام رنگ
اور اک نغمہ شکستہ ساز سے
نہ سہی ساز غم ساز تو ہے
زندگی کا کوئی انداز تو ہے
کس کے نغمے ، کس کا ساز
دیکھ زمانے کے انداز

سراج الدین ظفر

اے اہلِ نظر سوز ہمیں ساز ہمیں ہیں
عالم میں پسِ پردہ پرواز ہمیں ہیں

عبدالحمید عدم

اب دو عالم سے صدائے ساز آتی ہے مجھے
دل کی آہٹ سے تری آواز آتی ہے مجھے
اس کی نازک انگلیوں کو دیکھ کر اکثر عدمؔ
ایک ہلکی سی صدائے ساز آتی ہے مجھے

قمر جلالوی

آہ کیا دل کے دھڑکنے کی جو آواز نہ ہو
نغمہ ہو جاتا ہے بے کیف اگر ساز نہ ہو
شکوہ شکستِ دل کا ہو کیا دستِ ناز سے
آئینے ٹوٹ جاتے ہیں آئینہ ساز سے
خود آئیں پوچھنے وہ مرے پاس حالِ دل
کچھ دور تو نہیں ہے مرے کار ساز سے

عرفان صدیقی

وہ میرے شیشے پہ آنا تمام گردِ ملال
پھر ایک شخص کا آئینہ ساز ہو جانا

احسان دانش

اے سرمدی ترانے ہر شے میں سوز بھر دے
یہ کس نے کہہ دیا ہے پابند ساز ہو جا
آ مل کے پھر بنائیں مے خانۂ محبت
میں جرعہ کش بنوں تو پیمانہ ساز ہو جا

اختر شیرانی

کروں نذر نغمۂ جاں فزا میں کہاں سے اخترؔ غم نوا
کہ سوائے نالۂ غم نہیں مرے دل کے غم زدہ ساز میں

اسرار الحق مجاز

سارا عالم گوش بر آواز ہے
آج کن ہاتھوں میں دل کا ساز ہے
ہم نشیں دل کی حقیقت کیا کہوں
سوز میں ڈوبا ہوا اک ساز ہے
ساری محفل جس پہ جھوم اٹھی مجازؔ
وہ تو آوازِ شکست ساز ہے
عیش سے بے نیاز ہیں ہم لوگ
بے خود سوز و ساز ہیں ہم لوگ
جس طرح چاہے چھیڑ دے ہم کو
تیرے ہاتھوں میں ساز ہیں ہم لوگ
محفل سوز و ساز ہے دنیا
حاصل سوز و ساز ہیں ہم لوگ

عبید اللہ علیم

غیب سمے کے گیان میں پاگل کتنی تان لگائے گا
جتنے سر ہیں ساز سے باہر اس سے زیادہ ساز میں چپ