مرزا غالب

غالب چھٹی شراب پر اب بھی کبھی کبھی
پیتا ہوں روزِ ابر و شبِ ماہتاب میں

انشاء اللہ خان انشا

پھر کبھی یہ کہ ابر میں کچھ کچھ
پرتو ماہتاب باقی ہے

شیخ ابراہیم ذوق

مہ جبیں یاد ہیں کہ بھول گئے
وہ شبِ ماہتاب کی باتیں

مصحفی غلام ہمدانی

مہ چار دہ کا عالم میں دکھاؤں گا فلک کو
اگر اس نے پردہ منہ سے شبِ ماہتاب الٹا

مومن خان مومن

کیا جلوے یاد آئے کہ اپنی خبر نہیں
بے بادہ مست ہوں میں شبِ ماہتاب میں

جون ایلیا

حفظ ہے شمس بازغہ مجھ کو
پر میسر وہ ماہتاب نہیں

جگر مراد آبادی

وہ لب جوئبار و موسمِ گل
وہ شبِ ماہتاب کا عالم

قمر جلالوی

ایسے میں وہ ہوں، باغ ہو، ساقی ہو اے قمر
لگ جائیں چار چاند شبِ ماہتاب میں

شکیب جلالی

پانی نہیں کہ اپنے ہی چہرے کو دیکھ لوں
منظر زمیں کے ڈھونڈتا ہوں ماہتاب میں
تارے ہیں نہ ماہتاب یارو
کچھ اس کا بھی سدباب یارو

عرفان صدیقی

نکل رہی ہیں طاق و در سے سایہ سایہ صورتیں
سنو! یہ بام سیر ماہتاب کے لیے نہیں

احسان دانش

ترے فراق کی راتیں تھیں اس قدر مغموم
کہ داغ خاطر محزوں تھا ماہتاب نہ تھا

اختر شیرانی

بجھا سا رہتا ہے دل جب سے ہیں وطن سے جدا
وہ صحنِ باغ نہیں سیر ماہتاب نہیں
ہمارے ہاتھ میں کب ساغرِ شراب نہیں
ہمارے قدموں پہ کس روز ماہتاب نہیں
اٹھا پیالہ کہ گلشن پہ پھر برسنے لگی
وہ مے کہ جس کا قدح ماہتاب ہے ساقی
نکال پردۂ مینا سے دخترِ رز کو
گھٹا میں کس لیے یہ ماہتاب ہے ساقی
الٰہی وہ بوئے پیرہن سے بھی پہلے ہو ہمکنار آ کر
چمن میں ہوتا ہے جلوہ افروز پھول سے ماہتاب پہلے
نظر نہ آیا کبھی شب کو ان کا جلوۂ رخ
یہ آفتاب کبھی ماہتاب ہو نہ سکا

شکیل بدایونی

زمیں پر فصلِ گل آئی فلک پر ماہتاب آیا
سبھی آئے مگر کوئی نہ شایان شباب آیا

فراق گورکھپوری

یہ رات آگ لگا دے کہیں نہ دنیا میں
یہ چاندنی یہ ہوائیں یہ ماہتاب کی آنچ

قتیل شفائی

نہا رہا ہوں میں اس کے بدن کی کرنوں میں
وہ آدمی ہے مگر ماہتاب جیسا ہے

ناصر کاظمی

سر کھلے ، پا برہنہ، کوٹھے پر
رات اسے ماہتاب میں دیکھا