باقی صدیقی

جنگل کے سناٹے سے کچھ نسبت تو ہے
شہر کے ہنگامے میں پھرتا کون اکیلا
ندی کے اس پار کھڑا اک پیڑ اکیلا
دیکھ رہا ہے ان جانے لوگوں کا ریلا

جون ایلیا

تجھ کو بھولا نہیں وہ شخص کہ جو
تیری بانہوں میں بھی اکیلا تھا

شکیب جلالی

بن میں بھی ساتھ گئے ہیں سائے
میں کسی جا تو اکیلا ہوتا
جہاں تلک بھی یہ صحرا دکھائی دیتا ہے
مری طرح سے اکیلا دکھائی دیتا ہے

عرفان صدیقی

تو کون ہیں یہ مرے ساتھ چلنے والے لوگ
وہ کہہ رہا تھا کہ ہر آدمی اکیلا ہے
میں بھی تنہائی سے ڈرتا ہوں کہ خاکم بدہن
آدمی کوئی خدا ہے ، کہ اکیلا رہ جائے

مصطفیٰ زیدی

ہم انجمن میں سب کی طرف دیکھتے رہے
اپنی طرح سے کوئی اکیلا نہیں ملا

جمال احسانی

دو قدم چل آتے اس کے ساتھ ساتھ
جس مسافر کو اکیلا دیکھتے

بشیر بدر

اداسی آسماں ہے دل مرا کتنا اکیلا ہے
پرندہ شام کے پل پر بہت خاموش بیٹھا ہے

عبید اللہ علیم

کیا سوانگ بھرے روٹی کے لیے عزت کے لیے شہرت کے لیے
سنو شام ہوئی اب گھر کو چلو کوئی شخص اکیلا گھر میں ہے

شاد عظیم آبادی

نہ جاں بازوں کا مجمع تھا نہ مشتاقوں کا میلا تھا
خدا جانے کہاں مرتا تھا میں جب تو اکیلا تھا

افضل منہاس

مل گیا مٹی میں جب افضلؔ تو یہ آئی صدا
گر گئی دیوار اور سایہ اکیلا ہو گیا

شاذ تمکنت

حسن کی خلوت سادہ بھی ہے صد بزم طراز
عشق محفل میں بھی ہو گا تو اکیلا ہو گا
مخدومؔ و جامیؔ آہ کہاں کھو کے رہ گئے
ارض دکن میں شاذؔ اکیلا دکھائی دے

ناصر کاظمی

آج تو میرا دل کہتا ہے
تو اس وقت اکیلا ہو گا