جون ایلیا

اب تو پنجاب بھی نہیں پنجاب
اور خود جیسا اب دو آب نہیں

جگر مراد آبادی

تنہائی فراق کے قربان جائیے
میں ہوں خیالِ یار ہے چشمِ پر آب ہے

سراج الدین ظفر

آئی ظفرؔ جو رات زباں پر حدیث دوست
ناگاہ بڑھ گئی مرے جوہر کی آب اور

شکیب جلالی

گزری ہے بار بار مرے سر سے موجِ خشک
ابھرا ہوا ہوں ڈوب کے تصویرِ آب میں
آنکھوں میں چتائیں جل رہی ہیں
ہونٹوں پہ ہے آب آب یارو
ساحل سے دور جب بھی کوئی خواب دیکھتے
جلتے ہوئے چراغ تہِ آب دیکھتے

رئیس فروغؔ

کیا سوچ کر ہوا ہے سمندر سے پنجہ کش
بوڑھے کو ایک روز تہہ آب دیکھنا

اختر شیرانی

پھر ایسا وقت کہاں ہم کہاں شراب کہاں
طلسم دہر ہے نقش بر آب پینے دے

عبید اللہ علیم

سطح ساحل نہ رہی جب کوئی قیمت ان کی
ہم خزانوں کو تہہ آب اٹھا کر لے آئے

غلام محمد قاصر

مکاں تو سطح دریا پر بنائے ہیں حبابوں نے
اثاثے گھر کے لیکن سب نے زیر آب رکھے ہیں

جلیل مانک پوری

پڑی تھی کشت تمنا جو خشک مدت سے
رہینِ منت چشمِ پر آب ہو کے رہی

حفیظ جالندھری

کہو تو رازِ حیات کہہ دوں حقیقت کائنات کہہ دوں
وہ بات کہہ دوں کہ پتھروں کے جگر کو بھی آب آب کر دے

فانی بدایونی

ہو گیا خون ترے ہجر میں دل کا شاید
اب تصور بھی ترا نقش بر آب آتا ہے

احمد فراز

حسرت گریہ میں جو آگ ہے اشکوں میں نہیں
خشک آنکھوں کو میری چشمہ بے آب سمجھ
اس تماشے میں الٹ جاتی ہیں اکثر کشتیاں
ڈوبنے والوں کو زیر آب مت دیکھا کرو

شاذ تمکنت

دم وداع سمندر بچھا رہا تھا کوئی
تمام شہر ہی چشمِ پر آب جیسا تھا

ناصر کاظمی

نیندیں بھٹکتی پھرتی ہیں گلیوں میں ساری رات
یہ شہر چھپ کے رات کو سوتا ہے آب میں