مرزا غالب

ہوں ز خود رفتۂِ بیدائے خیال
بھول جانا ہے نشانی میری

امام بخش ناسخ

تقسیم کیے پارۂ دل بزمِ بتاں میں
ہر ایک کے ہے پاس نشانی مرے دل کی

انشاء اللہ خان انشا

تھی جو وہ لاہی کی ٹوپی زعفرانی آپ کی
سو ہمارے پاس ہے اب تک نشانی آپ کی

حیدر علی آتش

صورتِ حال پر ہمارے مہر
داغ نے زخم نے نشانی کی
وہ خط ہے یادگار حسن رفتہ
وہ سبزہ ہے گلستاں کی نشانی
جان کی طرح سے رکھتا ہے عزیز اے گل رو
داغِ دل لالہ نے سمجھا ہے نشانی تیری

شیخ ابراہیم ذوق

مار کر تیر جو وہ دلبر جانی مانگے
کہہ دو ہم سے نہ کوئی دے کے نشانی مانگے

مصحفی غلام ہمدانی

جنس نے جنس کو قتل کیا کب دیکھیو بد ذاتی تو ذرا
یعنی جو ہو مرد مسلماں اس کی یہ ہی نشانی ہے

مرزا رفیع سودا

جس سمت نظر موجِ سراب آوے تو یہ جان
ہووے گی کسی زلف چلیپا کی نشانی

سراج الدین ظفر

تری محفل سے حسرت کی نشانی لے کے آیا ہوں
وفا کی آرزو تھی سرگرانی لے کے آیا ہوں
مری ہستی زمانے کے مٹائے سے نہیں مٹتی
ازل سے میں نشان بے نشانی لے کے آیا ہوں

عرفان صدیقی

اب کے برس کیا موسم ہے دل جنگل کی ویرانی کا
نا کوئی طائر سمتِ شجر کا‘ نا کوئی برگ نشانی کا
لوگ کیا جانیں کہ گزرے ہوئے موسم کیا تھے
جب قبا پر کوئی پیوند نشانی کا نہ ہو

احسان دانش

دشمن زیست پہ جاں دیتا ہوں
اور جینے کی نشانی کیا ہے

آنس معین

وقت گزرتا جاتا اور یہ زخم ہرے رہتے تو
بڑی حفاظت سے رکھی ہے تیری نشانی کہتے

بہزاد لکھنوی

اب دل میں رہا کیا ہے جز حسرت و ناکامی
وہ نیش کہاں باقی خود جس کی نشانی تھی
سادہ نظر آتا ہے اب تو ورق دامن
اب تک مرے دامن پر آنکھوں کی نشانی تھی
نہیں دل میں داغِ تمنا بھی باقی
انہیں پر سے ان کی نشانی لٹا دی

عبید اللہ علیم

نہ ہو گی خشک کہ شاید وہ لوٹ آئے پھر
یہ کشت گزرے ہوئے ابر کی نشانی ہوئی