مرزا غالب

منظور تھی یہ شکل تجلی کو نور کی
قسمت کھلی ترے قد و رخ سے ظہور کی

امام بخش ناسخ

ہو گیا مے سے نشۂِ عرفان
نار نے نور کر دیا ہم کو

انشاء اللہ خان انشا

کیوں ساقی خورشید جبیں کیا ہے نشہ ہوں
سب یوں ہی چڑھا جاؤں مے نور کی گردن

مصحفی غلام ہمدانی

حسن ایسا کہاں ہے مہر و مہ میں
کچھ اور ہی ہے یہ نور اللہ

مرزا رفیع سودا

پڑھیے درود حسن صبیح و ملیح پر
جلوہ ہر ایک پر ہے محمد کے نور کا

یگانہ چنگیزی

واعظ کی آنکھیں کھل گئیں پیتے ہی ساقیا
یہ جامِ مے تھا یا کوئی دریائے نور تھا

باقی صدیقی

ظلمت زیست کی بساط ہی کیا
مے کا اک گھونٹ اور نور ہی نور

جگر مراد آبادی

تاریک مثل آہ جو آنکھوں کا نور تھا
کیا صبح ہی سے شام بلا کا ظہور تھا

خواجہ میر درد

رات مجلس میں ترے حسن کے شعلے کے حضور
شمع کے منہ پہ جو دیکھا تو کہیں نور نہ تھا

عبدالحمید عدم

تیرے رخ پر ہے یہ پریشانی
اک اندھیرے میں نور ہے ساقی

قمر جلالوی

میں شام سے لے جر تا بہ سحر دل میں یہ کہتا رہتا ہوں
ہے چاند بے شک نورِ قمر لیکن ان کا سا نور نہیں
خود ہی آ جائے تو آ جائے ترا نور کبھی
ورنہ اب موسیٰ نہ جائیں گے سرِ طور کبھی

شکیب جلالی

یہ چراغ اپنے لیے رہنے دو
تیری راتیں بھی تو بے نور ہیں دوست

اختر شیرانی

سیہ خانۂ غم ہے ساقی زمانہ
بس اک جام اور نور ہی نور کر دوں

ضیا جالندھری

راستے تیرہ سہی سینے تو بے نور نہیں
آنکھ جو دیکھ رہی ہے ہمیں منظور نہیں

ماجد صدیقی

ان دنوں اس خاک پر بارش تھی جیسے نور کی
آنکھ کا سرمہ بنی تھی ریت کیمبل پور کی
حسن کے مدِ مقابل عشق!! اور بے چارگی؟
دل میں ہے تصویر جیسے محفل بے نور کی

تلوک چند محروم

دور ہے صبح شبِ غم اے دل
ہے ستاروں میں ابھی نور بہت

حسرت موہانی

دل کو خیالِ یار نے مخمور کر دیا
ساغر کو رنگِ بادہ نے پر نور کر دیا

شکیل بدایونی

وفا پر مردنی سی چھا چلی ہے
ستم کا نور ہوتے جا رہے ہیں
فراق و ہجر کے تاریک لمحے
سراپا نور ہوتے جا رہے ہیں

عزیز حامد مدنی

اے میرے خورشید شبی کیا وہم طلوع و غروب تجھے
ایک تری گردش ایسی تھی خانۂ دل بے نور رہا

فانی بدایونی

میری نظر کی آڑ میں ان کا ظہور تھا
اللہ ان کے نور کا پردہ بھی نور تھا

شاذ تمکنت

چلا گیا ہے مکیں چھوڑ کر مکاں اپنا
کوئی نہیں ہے مگر چھن رہا ہے نور اب تک

ناصر کاظمی

تنہا تنہا پھرتے ہیں
دلِ ویراں آنکھیں بے نور