مرزا غالب

بزمِ قدح سے عیشِ تمنا نہ رکھ، کہ رنگ
صید ز دام جستہ ہے اس دام گاہ کا
سنتے ہیں جو بہشت کی تعریف، سب درست
لیکن خدا کرے وہ ترا جلوہ گاہ ہو

امام بخش ناسخ

ہے دلِ سوزاں میں طور اس کی تجلی گاہ کا
روئے آتش ناک ہر شعلہ ہے میری آہ کا

حیدر علی آتش

ہوں وہ ابتر طفل جس کو جان کھونا کھیل ہے
کنج مرقد ہے گھروندا میری بازی گاہ کا
حسن میں آپ کے ہے شانِ خدا
عشق بازوں کے سجدہ گاہ ہو تم

داغ دہلوی

فلک کی طرح جفائیں نہ کیجیے ہر روز
اسی قدر ہے یہ نعمت جو گاہ گاہ ملے

مصحفی غلام ہمدانی

کیا وہ بھی دن تھے خوب کہ لوٹیں تھے مصحفیؔ
ہم بھی نظارۂِ گہہ و بے گاہ کا مزا

مومن خان مومن

تشنہ لب ایسے ہم گرے مے پر
کہ کبھی سیر عید گاہ نہ کی
تھا بہت شوقِ وصل تو نے تو
کمی اے حسن تاب گاہ نہ کی
تھا مقدر میں اس سے کم ملنا
کیوں ملاقات گاہ گاہ نہ کی

میر مہدی مجروح

جانا ز بس ضرور تھا اس جلوہ گاہ میں
ہم دیر و کعبہ چھوڑ گئے دونوں راہ میں
بکھرے ہیں پھول ادھر تو دھرے ہیں ادھر کو جام
ہے بوئے عطر فتنہ تری خواب گاہ میں
صوفی نہ خانقاہ میں نے رند دیر میں
مجمع ہے اک جہاں کا تری جلوہ گاہ میں

جگر مراد آبادی

تنقید حسن مصلحت خاص عشق ہے
یہ جرم گاہ گاہ کیے جا رہا ہوں میں

ادا جعفری

انتہائے جنوں مبارک باد
پرسشِ حال گاہ گاہ گئی

ضیا جالندھری

اب ہے وہ نگہ نہ وہ تبسم
کچھ اور تھی گاہ گاہ کی بات

جلیل مانک پوری

اب کون پھر کے جائے تری جلوہ گاہ سے
او شوخ چشم پھونک دے برق نگاہ سے

حفیظ جالندھری

کمبخت دل برا ہوا تری آہ آہ کا
حسن نگاہ بھی نہ رہا گاہ گاہ کا
میرے مقلدوں کو مری راہِ شوق میں
ہر گام پر نشان ملا سجدہ گاہ کا

ناصر کاظمی

دل ایک عجیب گھر ہے پیارے
اس گھر میں بھی گاہ گاہ رہنا