مرزا غالب

وارفتگی دل ہے یا دستِ تصرف ہے
ہیں اپنے تخیل میں دن رات بہم تجھ سے

بہادر شاہ ظفر

کہاں آنسو کے قطرے خونِ دل سے ہیں بہم نکلے
یہ دل میں جمع تھے مدت سے کچھ پیکانِ غم نکلے

باقی صدیقی

یوں بھی ملتی ہیں وہ نظریں جیسے
اک تعلق سا بہم رکھتے ہیں
چونک چونک اٹھے خرد کے بندے
جب بھی مل بیٹھے بہم دیوانے

عرفان صدیقی

کتنی بھولی ہوئی یادوں نے سنبھالا دل کو
جیسے پردیس میں ہوں دوست بہم دلی کے

مصطفی زیدی

کوئی رفیق بہم ہی نہ ہو تو کیا کیجے
کبھی کبھی ترا غم ہی نہ ہو تو کیا کیجے

رئیس فروغؔ

پھر کبھی ہوں نہ ہوں ہم بہم دوستو
مہرباں دوستو محترم دوستو

ضیا جالندھری

کچھ لب پہ کچھ آنکھوں میں لے آئے سجا کر ہم
جو رنج کہ ہاتھ آئے جو غم کہ بہم پہنچے

احمد راہی

گرفتہ دل ہیں بتان حرم کہ اب شاعر
نشاط‌ و عیش کے ساماں بہم نہیں کرتے

ثروت حسین

کس فصل میں کب یکجا ہوں گے
سامان ہوئے ہیں بہم ایسے

حسرت موہانی

جفائے یار کے شکوے نہ کر اے رنج ناکامی
امید و یاس دونوں ہوں بہم ایسا بھی ہوتا ہے

عزیز حامد مدنی

ترے بندِ قبا سے رشتۂ انفاس دوراں تک
کچھ عقدے ناخنوں کو بھی بہم ہوتے ہی رہتے ہیں

احمد فراز

مزاجوں میں اتر جاتی ہے تبدیلی مری جاں
سو رہ سکتے تھے کیسے ہم بہم تم جانتے تھے

کلیم عاجز

تم جہاں ہو بزم بھی ہے شمع بھی پروانہ بھی
ہم جہاں ہوتے ہیں یہ ساماں بہم ہوتا نہیں

ناصر کاظمی

رہ نوردِ بیابانِ غم صبر کر صبر کر
کارواں پھر ملیں گے بہم صبر کر صبر کر