مرزا غالب

وہ داد ودید گراں مایہ شرط ہے ہمدم
وگرنہ مہرِ سلیمان و جامِ جم کیا ہے

بہادر شاہ ظفر

ہمیشہ چاہتا ہے دل کہ مل کر کیجے مے نوشی
میسر جامِ مے جم جم ہمیں بھی ہو تمہیں بھی ہو

حیدر علی آتش

نظر آیا تماشائے جہاں جب بند کیں آنکھیں
صفائے قلب سے پہلو میں ہم نے جامِ جم پایا

داغ دہلوی

ہمیں چشمِ بینا دکھاتی ہے سب کچھ
وہ اندھے ہیں جو جامِ جم دیکھتے ہیں

مصطفٰیٰ خان شیفتہ

کھل گئی غیر سے الفت اس کی
جامِ مے سے مجھے جم یاد آیا

فیض احمد فیض

جان جائیں گے جاننے والے
فیض، فرہاد و جم کی بات کرو
جس نور سے ہے شہر کی دیوار درخشاں
یہ خونِ شہیداں ہے کہ زرخانۂ جم ہے

باقی صدیقی

کوئی نسبت نہیں اربابِ نظر سے باقیؔ
سائے کی طرح پس ساغرِ جم ہیں ہم لوگ

شکیب جلالی

مجھ سے ملنے شبِ غم اور تو کون آئے گا
میرا سایہ ہے جو دیوار پہ جم جائے گا

عرفان صدیقی

یہی اک دھوپ کا ٹکڑا‘ یہی اک کوزۂ خاک
ہم اسے دولتِ اسکندر و جم جانتے ہیں
سنا ہے گردِ راہ بوترابؑ آنے کو ہے سر پر
سو میں نے خاک پر تاج مئے و جم رکھ دیا دیکھو

مصطفیٰ زیدی

پتھروں سے بھی نکل آیا جو تیر
وہ مرے پہلو میں آ کر جم رہا

ماجد صدیقی

دل کو پتھر نہ سمجھنا مری جاں
لے تجھے ساغرِ جم دیتے ہیں

جوش ملیح آبادی

نمایاں ہو چلا ہے اک جہاں چشم تصور پر
نظر شاید حریف ساغر جم ہوتی جاتی ہے

فانی بدایونی

مستی ہوش کے فسانے ہیں
جشن پرویز و عشرت جم کیا

احمد فراز

قیامت ہے کہ ہر مے خوار پیاسا
مگر کوئی حریفِ جم نہیں ہے

قتیل شفائی

پیاسے ہی گزر جائیں گے ہم راہِ طلب سے
عبرت کے لیے ساغرِ جم ساتھ رہے گا

ناصر کاظمی

کبھی دیکھی تھی اس کی ایک جھلک
رنگ سا جم رہا ہے آنکھوں میں