مرزا غالب

نے تیر کماں میں ہے ، نہ صیاد کمیں میں
گوشے میں قفس کے مجھے آرام بہت ہے

امام بخش ناسخ

اپنے آرام سے ہوں دشتِ جنوں میں تنہا
کسی محبوب دل آرام سے کچھ کام نہیں

انشاء اللہ خان انشا

تم نے تو نہیں خیر یہ فرمائیے بارے
پھر کن نے لیا راحت و آرام ہمارا
ناداں کہاں طرب کا سرانجام اور عشق
کچھ بھی تجھے شعور ہے آرام اور عشق

بہادر شاہ ظفر

لے گیا دل کا جو آرام ہمارے یا رب
اس دل آرام کو مطلق کبھی آرام نہ ہو

حیدر علی آتش

آئنہ خانہ کریں گے دلِ ناکام کو ہم
پھیریں گے اپنی طرف روئے دل آرام کو ہم
ناز و ادا ہے تجھ سے دل آرام کے لیے
یہ جامہ قطع ہے ترے اندام کے لیے

داغ دہلوی

رات دن پھرتا ہے کیوں اے چرخِ پیر
تیرے دن ہیں راحت و آرام کے
یا جگر میں یا رہے گا دل میں تیر
یہ ہی دو گوشے تو ہیں آرام کے
خوگر بیداد کو راحت ہے موت
بھاگتا ہوں نام سے آرام کے

مصحفی غلام ہمدانی

جب تک یہ محبت میں بد نام نہیں ہوتا
اس دل کے تئیں ہرگز آرام نہیں ہوتا

مصطفٰی خان شیفتہ

مر گئے پر نہ گیا رنج کہ وہ
گور پر آئے تو آرام آیا
تپشِ دل کے سبب سے ہے مجھے خواہشِ مرگ
کون ہے جس کو نہ منظور ہو آرام اپنا
جب پردہ اٹھا تب ہے عدو دوست کہاں تک
آزارِ عدو سے مجھے آرام نہ ہو گا

مومن خان مومن

گر غیر کے گھر سے نہ دل آرام نکلتا
دم کاہے کو یوں اے دلِ ناکام نکلتا