مرزا غالب

ہے ذرہ ذرہ تنگی جا سے غبارِ شوق
گردام یہ ہے وسعتِ صحرا شکار ہے

امام بخش ناسخ

لگا جو تیر ترا سینۂِ مشبک میں
میں خوش ہوا کہ مرے دام میں شکار آیا

داغ دہلوی

یہ صید گاہ عشق ہے ٹھہرائیے نگاہ
صیاد مضطرب سے نہ ہو گا شکار دل
آنکھ ہے ترک زلف ہے صیاد
دیکھیں دل کا شکار کون کرے
جس نے چاہا پھنسا لیا ہم کو
دلبروں کے شکار ہم بھی ہیں

شیخ ابراہیم ذوق

ہے دل کی داؤ گھات میں مژگاں سے چشمِ یار
ہے شوق اس کی ٹٹی کی اوجھل شکار کا

مصحفی غلام ہمدانی

دل خستہ پہلو میں رہ گیا مرے سرد ہو کے تو کیا عجب
کہ کسی کی صافی شست کا یہ خدنگ خوردہ شکار تھا
جاؤں کدھر کو یارو مانند صید خرگہ
مژگاں نے کر رکھا ہے اس کی شکار مجھ کو
خدنگ خوردہ دل آگے سے اس کے جاتا ہے
خبر نہیں کہ کہاں یہ شکار ٹھہرے گا
ناوک کا ترے شکار گہ میں
ہر گوشے نیا شکار ہے اور

مومن خان مومن

نہ گیا تیر نالہ سوئے رقیب
مرغ عرشی شکار ہونا تھا

مرزا رفیع سودا

چشمِ کرم سے عاشق وحشی اسیر ہو
الفت ہے دام آہوئے دل کے شکار کا
جس دم وہ صنم سوار ہووے
تا صید حرم شکار ہووے

باقی صدیقی

چمن کی خاک سے پیدا ہوا ہے کانٹا بھی
یہ اور بات کہ حالات کا شکار ہوا

قمر جلالوی

ابرو چڑھے ہوئے ہیں دل بے قرار پر
دو دو کھنچی ہوئی ہیں کمانیں شکار پر
دل کے اوپر نگاہِ یار نہیں
تیر منت کشِ شکار نہیں

اختر شیرانی

وہی نظر ہے نظر جو بایں ہمہ پستی
ستارہ گیر رہی کہکشاں شکار رہی

اسرار الحق مجاز

گیسوؤں والوں میں ابرو کے کماں داروں میں
ایک صید آ ہی گیا ایک شکار آ ہی گیا

بہزاد لکھنوی

ہم نے تو غم کو سینے سے اپنے لگا لیا
غم نے ہمیں شکار کیا ہائے کیا کیا

علی سردار جعفری

لے جا کے انہیں کہاں سجائیں
یہ بھوک کے شکار چہرے
کم ہو کیوں ابروئے قاتل کی کمانوں کا کھنچاؤ
جب سر تیرِ ستم آپ شکار آتے ہیں
خبر نہیں ہے بموں کے بنانے والوں کو
تمیز ہو تو مہ و مہر و کہکشاں ہیں شکار