مرزا غالب

مدعا محوتماشائے شکستِ دل ہے
آئنہ خانے میں کوئی لیے جاتا ہے مجھے

امام بخش ناسخ

غیر جب کہتا ہے اس پر میں بھی مرتا ہوں تب آہ
وہ تو کیا مرتا ہے بس غیرت سے مر جاتا ہوں میں
آ نکلتا ہے کبھی پر بات وہ کرتا نہیں
بولتا ہے تو یہ کہتا ہے کہ اب جاتا ہوں میں

مصحفی غلام ہمدانی

کبھی تو بیٹھوں ہوں جا اور کبھی اٹھ آتا ہوں
منوں ہوں آپ ہی پھر آپھی روٹھ جاتا ہوں
تصور تیری صورت کا مجھے ہر شب ستاتا ہے
کبھو پاس آئے ہے میرے کبھو پھر بھاگ جاتا ہے
بزم میں اس تند خو کی دوڑ دوڑ
کام کیا؟ کیوں؟ کس لیے جاتا ہے تو

یگانہ چنگیزی

لب دریا کا ہوا میں نہ تہِ دریا کا
کون سے گھاٹ یہ دھارا لیے جاتا ہے مجھے

باقی صدیقی

کا آسرا و دیکھئے
کا لطف بھی جاتا رہا
تو لہو کی طرح میرے جسم میں گردش کرے
سانس کی مانند میں آتا رہوں جاتا رہوں

جگر مراد آبادی

جب مکان و لا مکاں سب سے گزر جاتا ہوں میں
اللٰہ اللٰہ تجھ کو خود اپنی جگہ پاتا ہوں میں
میری ہستی شوق پیہم میری فطرت اضطراب
کوئی منزل ہو مگر گزرا چلا جاتا ہوں میں
تیری محفل تیرے جلوے پھر تقاضا کیا ضرور
لے اٹھا جاتا ہوں ظالم لے چلا جاتا ہوں میں
میری خاطر اب وہ تکلیف تجلی کیوں کریں
اپنی گرد شوق میں خود ہی چھپا جاتا ہوں میں
دل مجسم شعر و نغمہ وہ سراپا رنگ و بو
کیا فضائیں ہیں کہ جن میں حل ہوا جاتا ہوں میں
واہ رے شوقِ شہادت کوئے قاتل کی طرف
گنگناتا رقص کرتا جھومتا جاتا ہوں میں
یا وہ صورت خود جہانِ رنگ و بو محکوم تھا
یا یہ عالم اپنے سائے سے دبا جاتا ہوں میں
شاعر فطرت ہوں جب بھی فکر فرماتا ہوں میں
روح بن کر ذرے ذرے میں سما جاتا ہوں میں
جس قدر افسانۂ ہستی کو دہراتا ہوں میں
اور بھی بیگانۂ ہستی ہوا جاتا ہوں میں

خواجہ میر درد

راہ پینڈے کبھو اس شوخ کے تئیں ہم سے بھی
دید وا دید تو ہوتی ہے جو مل جاتا ہے
اگر یوں ہی یہ دل ستاتا رہے گا
تو اک دن مرا جی ہی جاتا رہے گا

عرفان صدیقی

میں تو اس دشت میں خود آیا تھا کرنے کو شکار
کون یہ زین سے باندھے لیے جاتا ہے مجھے

شاد عظیم آبادی

لطف کیا ہے بے خودی کا جب مزا جاتا رہا
یوں نہ مانوں میں مگر ساغر تو سمجھاتا رہا

شکیل بدایونی

آنکھ سے آنکھ ملاتا ہے کوئی
دل کو کھینچے لیے جاتا ہے کوئی
سب کرشمات تصور ہیں شکیلؔ
ورنہ آتا ہے نہ جاتا ہے کوئی

اختر ہوشیارپوری

شاید اپنا ہی تعاقب ہے مجھے صدیوں سے
شاید اپنا ہی تصور لئے جاتا ہے مجھے
باہر آوازوں کا اک میلہ لگا ہے دیکھو
کوئی اندر سے مگر توڑتا جاتا ہے مجھے
جاگتی آنکھوں میں اخترؔ عکس کیا
میں نے دیکھا قافلا جاتا ہوا

محسن نقوی

کتنے جگنو اسی خواہش میں مرے ساتھ چلے
کوئی رستہ ترے گھر کو بھی تو جاتا ہو گا

ناصر کاظمی

اک بھولے ہوئے دیس کا سپنا
آنکھوں میں گھلتا جاتا تھا
جنگل جنگل، بستی بستی
ریت کا شہر اڑا جاتا تھا
ایک طویل سفر کا جھونکا
مجھ کو دور لیے جاتا تھا
جلتی سانسوں کی گرمی سے
شیشہِ تن پگھلا جاتا تھا
کتنی تیز اداس ہوا تھی
دل کا چراغ بجھا جاتا تھا
بات نہ کر صورت تو دکھا دے
تیرا اس میں کیا جاتا ہے