تند ہے ، تلخ ہے ، لیکن ہے مئے ناب لذیذ
مصطفٰی خان شیفتہ
طلبِ بوسہ پر اس لب سے شکر آب لذیذ
تند ہے ، تلخ ہے ، لیکن ہے مئے ناب لذیذ
کچھ مزا تو نہ سمجھ خضرِ امورِ عشرت
سب مزاجوں میں نہیں ایک سے اسباب لذیذ
سم کی تاثیر کرے ہجر میں آب حیواں
مے گل گوں سے سوا وصل میں ہے آب لذیذ
ردِ زحاد سہی پر نہیں مقبولِ مغاں
تا نہ معلوم ہو تلخیِ مے ناب لذیذ
شیفتہ ذوقِ سحر اس نے کہاں دیکھا ہے
وہ جو کہتا ہے کہ ہے آخرِ شب، خواب لذیذ