مرزا غالب

شب کہ ذوقِ گفتگو سے تیرے ، دل بے تاب تھا
شوخی وحشت سے افسانہ فسون خواب تھا
ہے غیبِ غیب جس کو سمجھتے ہیں ہم شہود
ہیں خواب میں ہنوز، جو جاگے ہیں خواب میں
تا پھر نہ انتظار میں نیند آئے عمر بھر
آنے کا عہد کر گئے آئے جو خواب میں
نہ ہو بہ ہرزہ روادار سعیِ بے ہودہ
کہ دورِ عیش ہے مانا خیال و خواب کے ساتھ
ہزار حیف کہ اتنا نہیں کوی غالب
کہ جاگنے کو ملا دے وے آ کے خواب کے ساتھ
وہ آ کے ، خواب میں ، تسکینِ اضطراب تو دے
ولے مجھے تپشِ دل ، مجالِ خواب تو دے

امام بخش ناسخ

سما رہا ہے یہاں تک پری رخوں کا جمال
ہماری آنکھوں میں خالی مقام خواب نہیں
بشر کے جسم میں ہے جان مایۂِ غفلت
سو اے دیدۂِ تصویر کس کو خواب نہیں
بخت نے پائی جب کہ بیداری
میرے پائے طلب کو خواب ملا

انشاء اللہ خان انشا

یہ دو روزہ نشو و نما کو تو نہ سمجھ کہ نقش پر آب سے
یہ سراب ہے یہ حباب ہے فقط ایک قصۂِ خواب ہے
وہ عشق کہ سچ آنکھوں سے کاجل کو چرا لے
کس طرح نہ عاشق کے کرے خواب کی چوری
یہ شبِ گزشتہ دیکھا وہ خفا سے کچھ ہیں گویا
کہیں حق کرے کہ ہووے یہ ہمارا خواب الٹا
اڑ گئی نیند آنکھ سے کس کی
لذت خورد و خواب باقی ہے

حیدر علی آتش

مردم دیدۂِ قربانی ہوں میں دیوانہ
آئے دروازہ کھلے بن نہ کبھی خواب مجھے
چین لینے نہ دیا دردِ جدائی نے کبھی
کب میں سویا کہ جگایا نہیں بد خواب مجھے
شبِ فراق میں مجھ کو سلانے آیا تھا
جگایا میں نے جو افسانہ گو کو خواب آیا
موت مانگوں تو رہے آرزوئے خواب مجھے
ڈوبنے جاؤں تو دریا ملے پایاب مجھے

داغ دہلوی

شبِ وصلِ عدو تیری بلا سے
کسی مضطر کو خواب آئے نہ آئے

شیخ ابراہیم ذوق

کھلے ہے ناز سے گلشن میں غنچۂِ نرگس
ذرا دکھا تو اسے چشمِ نیم خواب تو دے
وقت پیری شباب کی باتیں
ایسی ہیں جیسے خواب کی باتیں

مصحفی غلام ہمدانی

جو خیال میں کسو کے شبِ ہجر سو گیا ہو
نہ ہو صبح کو الٰہی کبھی اس کا خواب الٹا
اس بن ہمیں جاگتے ہی گزری
جانا بھی نہ یہ کہ خواب کیا ہے
اٹھ مصحفیؔ آفتاب نکلا
اب تک تو دوانے خواب میں ہے
اے مصحفیؔ اٹھ یہ دھوپ آئی
اتنا بھی دوانے خواب کیا ہے
جانا یہ ہم نے وفات کے بعد
دیکھا جو جہاں میں خواب دیکھا
جو خفا ہوا میں جی میں کسی بات پر شبِ وصل
سحر اٹھ کے میرے آگے وہیں اس نے خواب الٹا
طور پر اپنے کسی دن بھی خور و خواب ہے یاں
زندگانی کا بھلا کون سا اسباب ہے یاں
آنا ہے یوں محال تو اک شب بہ خواب آ
مجھ تک خدا کے واسطے ظالم شتاب آ
سخت مشتاق ہے تمہارا دل
منہ دکھاؤ کبھی تو خواب میں جان

مصطفٰی خان شیفتہ

کیوں نہ اڑ جائے مرا خواب ترے کوچے میں
فرش ہے مخمل و کمخواب ترے کوچے میں
غیر نے سنگ جو پھینکے وہ ہوئے بالشِ سر
چین سے کرتے ہیں ہم خواب ترے کوچے میں
نہ کیجو غل اے خوش نوایانِ صبح
یہ ہے وقت ان کی شکر خواب کا
شیفتہ ذوقِ سحر اس نے کہاں دیکھا ہے
وہ جو کہتا ہے کہ ہے آخرِ شب، خواب لذیذ

مومن خان مومن

تیری جفا نہ ہو تو ہے سب دشمنوں سے امن
بدمست غیر محو دل اور بخت خواب میں

میر مہدی مجروح

اس کو پھرتا ہے ڈھونڈتا ہر سو
کیوں کر آنکھوں سے اڑ نہ جائے خواب

مرزا رفیع سودا

کیوں کر نہ بکوں میں ہاتھ اس کے
یوسف کی طرح میں خواب دیکھا

میر انیس

نمود و بود کو عاقل حباب سمجھے ہیں
وہ جاگتے ہیں جو دنیا کو خواب سمجھے ہیں
شباب کھو کے بھی غفلت وہی ہے پیروں کو
سحر کی نیند کو بھی شب کا خواب سمجھے ہیں
انیسؔ مخمل و دیبا سے کیا فقیروں کو
اسی زمین کو ہم فرشِ خواب سمجھے ہیں

باقی صدیقی

دل کو کیونکر فریب دیں باقیؔ
غم حقیقت ہے کوئی خواب نہیں
یا مقدر کہیں نہیں ملتا
یا کہیں محوِ خواب ملتا ہے

جون ایلیا

اب کسی سے مرا حساب نہیں
میری آنکھوں میں کوئی خواب نہیں
نہیں جڑتا خیال کو بھی خیال
خواب میں بھی تو کوئی خواب نہیں
انقلاب ایک خواب ہے سو ہے
دل کی دنیا خراب ہے سو ہے
اس شب تیرۂ ہمیشہ میں
روشنی ایک خواب ہے سو ہے
اور تو کیا تھا بیچنے کے لیے
اپنی آنکھوں کے خواب بیچے ہیں
تشنگی نے سراب ہی لکھا
خواب دیکھا تھا خواب ہی لکھا

جگر مراد آبادی

ہم سے غفلت نہ ہو تو پھر کیا ہو
رہرو ملک خواب ہیں ہم لوگ
جب وہ آئے تو پیشتر سب سے
میری آنکھوں کو اذن خواب ہوا
دور ہنگامۂ نشاط نہ پوچھ
اب وہ سب کچھ خیال و خواب ہوا
زانوئے شوق پر وہ پچھلے پہر
نرگس نیم خواب کا عالم
وہ سماں آج بھی ہے یاد جگرؔ
ہاں مگر جیسے خواب کا عالم
زہے خواب و تعبیر خواب محبت
محبت ہی نکلی جواب محبت

سراج الدین ظفر

سب ماسوائے عشق فریبِ سراب ہے
میں بھی ہوں خواب میری جوانی بھی خواب ہے

عبدالحمید عدم

آنکھ کا اعتبار کیا کرتے
جو بھی دیکھا وہ خواب میں دیکھا
ہجر کی رات سو گئے تھے عدمؔ
صبح محشر کو خواب میں دیکھا

قمر جلالوی

صیاد آج میرے نشیمن کی خیر ہو
بجلی قفس پہ ٹوٹتی دیکھی ہے خواب میں

شکیب جلالی

اتریں عجیب روشنیاں رات خواب میں
کیا کیا نہ عکس تیر رہے تھے سراب میں
جینے کے ساتھ موت کا ہے ڈر لگا ہوا
خشکی دکھائی دی ہے سمندر کو خواب میں
ساحل سے دور جب بھی کوئی خواب دیکھتے
جلتے ہوئے چراغ تہِ آب دیکھتے
بیتے دنوں کے زخم کریدے ہیں رات بھر
آئی نہ جن کو نیند وہ کیا خواب دیکھتے

عرفان صدیقی

میں کیا بتاؤں جاگتا ہوں رات رات کس لیے
نہیں، کسی کی چشمِ نیم خواب کے لیے نہیں
حقیقتیں بھی سہانی دکھائی دیتی ہیں
بسا ہوا مری آنکھوں میں خواب کتنا ہے
اٹھو یہ منظرِ شب تاب دیکھنے کے لیے
کہ نیند شرط نہیں خواب دیکھنے کے لیے

رئیس فروغؔ

دستِ دعا میں شعلہ ء نایاب دیکھنا
ہر شب ہمیں چمکتے ہوئے خواب دیکھنا

احسان دانش

جو لے کے ان کی تمنا کے خواب نکلے گا
بہ عجز شوق بہ حالِ خراب نکلے گا
ابھی تو صبح ہوئی ہے شب تمنا کی
بہیں گے اشک تو آنکھوں سے خواب نکلے گا
نسیمِ صبح سے شاخیں ملیں تو میں سمجھا
کہ حسن عالم طفلی میں نیم خواب اٹھا

اختر شیرانی

گلزار جہاں میں گل کی طرح گو شاد ہیں ہم شاداب ہیں ہم
کہتی ہے یہ ہنس کر صبح خزاں سب ناز عبث اک خواب ہیں ہم
کس ماہ لقا کے عشق میں یوں بے چین ہیں ہم بیتاب ہیں ہم
کرنوں کی طرح آوارہ ہیں ہم تاروں کی طرح بے خواب ہیں ہم
مٹ جانے پہ بھی مسرور ہیں ہم مرجھانے پہ بھی شاداب ہیں ہم
شہبائے شباب و عشق کا اک بھولا ہوا رنگیں خواب ہیں ہم
وہ باغ و راغ کے دلچسپ و دل نشیں منظر
کہ جن کے ہوتے ہوئے خلد مثل خواب نہیں
برنگ زلفِ پریشاں وہ موج ہائے رواں
کہ جن کی یاد میں راتوں کو فکر خواب نہیں
وطن کا چھیڑ دیا کس نے تذکرہ اخترؔ
کہ چشمِ شوق کو پھر آرزوئے خواب نہیں
شبِ بہار میں زلفوں سے کھیلنے والے
ترے بغیر مجھے آرزوئے خواب نہیں
وطن کا چھیڑ دیا کس نے تذکرہ اخترؔ
کہ چشمِ شوق کو پھر آرزوئے خواب نہیں
حریم عشرت میں سونے والے شمیم گیسو کی مستیوں سے
مری جوانی کی سادہ راتوں کو اب تو سرشار خواب کر دے
خدا نہ لائے وہ دن کہ تیری سنہری نیندوں میں فرق آئے
مجھے تو یوں اپنے ہجر میں عمر بھر کو بیزار خواب کر دے
وہ پوچھتے ہیں ترے دل کی آرزو کیا ہے
یہ خواب ہائے کبھی میرا خواب ہو نہ سکا

اسرار الحق مجاز

اٹھیں گے ابھی اور بھی طوفاں مرے دل سے
دیکھوں گا ابھی عشق کے خواب اور زیادہ
یہاں تو رات کی بیداریاں مسلم ہیں
مگر وہاں بھی حسیں انکھڑیوں میں خواب نہیں

بشیر بدر

اداس رات ہے کوئی تو خواب دے جاؤ
مرے گلاس میں تھوڑی شراب دے جاؤ

عبید اللہ علیم

کوچۂ عشق سے کچھ خواب اٹھا کر لے آئے
تھے گدا تحفۂ نایاب اٹھا کر لے آئے
ہائے وہ لوگ گئے چاند سے ملنے اور پھر
اپنے ہی ٹوٹے ہوئے خواب اٹھا کر لے آئے

غلام محمد قاصر

بارود کے بدلے ہاتھوں میں آ جائے کتاب تو اچھا ہو
اے کاش ہماری آنکھوں کا اکیسواں خواب تو اچھا ہو
کتاب آرزو کے گم شدہ کچھ باب رکھے ہیں
ترے تکیے کے نیچے بھی ہمارے خواب رکھے ہیں

فارغ بخاری

کون وہ باتیں سنتا ہے جو فصل جنوں کے باب میں ہیں
کس کس کو بیدار کروں سب سورج میرے خواب میں ہیں

ماجد صدیقی

آتا ہے یاد اب بھی سراپا وہ خواب سا
اترا جو میری تشنہ لبی پر سحاب سا

جلیل مانک پوری

کس نے کہہ دی ان سے میری داستاں
چونک چونک اٹھتے ہیں خواب ناز سے
وہ بزمِ عیش جو رہتی تھی گرم راتوں کو
فسانہ ہو کے رہی ایک خواب ہو کے رہی

ثروت حسین

منہدم ہوتی ہوئی آبادیوں میں فرصت یک خواب ہوتے
ہم بھی اپنے خشت زاروں کے لیے آسودگی کا باب ہوتے

حسرت موہانی

آمد یار کی امید نہ چھوڑ
دیکھ اے آنکھ میل خواب نہ کر

رسا چغتائی

زندگی کے سراب بھی دیکھوں
نیند آئے تو خواب بھی دیکھوں
ڈوب جاؤں کسی سمندر میں
پھر جزیروں کے خواب بھی دیکھوں

سیف الدین سیف

شگفت غنچۂ مہتاب کون دیکھے گا
میں سو گیا تو مرے خواب کون دیکھے گا

سیماب اکبر آبادی

وہاں ہم آرزوئے خواب عیش کیا کرتے
جہاں قیام بمقدار خواب ہو نہ سکا
زندگی جس میں سانس لیتی تھی
وہ زمانہ خیال و خواب ہے آج

شاد عظیم آبادی

ڈھونڈوگے اگر ملکوں ملکوں ملنے کے نہیں نایاب ہیں ہم
جو یاد نہ آئے بھول کے پھر اے ہم نفسو وہ خواب ہیں ہم

شان الحق حقی

جہانِ دل میں ہوئے انقلاب اور ہی کچھ
مری نگاہ نے دیکھے تھے خواب اور ہی کچھ

شکیل بدایونی

ہاں اے غم عشرت گذشتہ
اک فرصت خواب چاہتا ہوں

فانی بدایونی

رازِ ہستی کی جستجو میں رہے
رات تعبیر خواب میں گزری
موت کی نیند بھی اب چین سے سونا معلوم
کہ جنازے پہ وہ غارت گر خواب آتا ہے
بیش از گمان خواب نہیں فرصت حیات
فانیؔ تم اس خیال کو سمجھے ہو خواب کیا
گدگداتا ہے تصور چٹکیاں لیتا ہے درد
کیا کسی بے خواب کی آنکھوں میں خواب آنے کو ہے

اختر ہوشیارپوری

پرانے خوابوں سے ریزہ ریزہ بدن ہوا ہے
یہ چاہتا ہوں کہ اب نیا کوئی خواب دیکھوں

احمد فراز

تجھ کو کہاں چھپائیں کہ دل پر گرفت ہو
آنکھوں کو کیا کریں کہ وہی خواب دیکھنا
یہ بھی وا ہے کسی مانوس کرن کی خاطر
روزنِ در کو بھی اک دیدۂ بے خواب سمجھ
کہاں وہ قرب کہ اب تو یہ حال ہے جیسے
ترے فراق کا عالم بھی خواب جیسا ہے
جانے ہجر کی رات کہ وصل کی رات گزار کے آئے ہو
آنکھیں نیندوں نیند بھری ہیں جسم ہے خوابوں خواب بھرا
عاشقی میں میرؔ جیسے خواب مت دیکھا کرو
باؤلے ہو جاؤ گے مہتاب مت دیکھا کرو
نہ سہہ سکا جب مسافتوں کے عذاب سارے
تو کر گئے کوچ میری آنکھوں سے خواب سارے
دل بہلتا ہے کہاں انجم و مہتاب سے بھی
اب تو ہم لوگ گئے دیدۂ بے خواب سے بھی

امیر مینائی

نصیب جاگ اٹھے سو گئے جو پانوں مرے
تمہارے کوچے سے بہتر مقام خواب نہ تھا

شاذ تمکنت

بہت ہجوم تھا تعبیر کی دکانوں پر
ہمیں تھے ورنہ کوئی جنس خواب کیا لیتا
ہوا کے دوش پہ رقص سحاب جیسا تھا
ترا وجود حقیقت میں خواب جیسا تھا

فراق گورکھپوری

زمین جاگ رہی ہے کہ انقلاب ہے کل
وہ رات ہے کوئی ذرہ بھی محوِ خواب نہیں

قتیل شفائی

کیا خبر کب نیند آئے دیدۂ بے خواب میں
شام سے ہم جل رہے ہیں سایۂ مہتاب میں

محسن نقوی

جب ہجر کے شہر میں دھوپ اتری میں جاگ پڑا تو خواب ہوا
مری سوچ خزاں کی شاخ بنی ترا چہرہ اور گلاب ہوا

ناصر کاظمی

یہ آج راہ بھول کے آئے کدھر سے آپ
یہ خواب میں نے رات ہی دیکھا تھا خواب میں
فرصتِ موسمِ نشاط نہ پوچھ
جیسے اک خواب، خواب میں دیکھا