دعا قبول ہو یا رب کہ عمرِ خضر دراز
مرزا غالب
حریف مطلب مشکل نہیں فسون نیاز
دعا قبول ہو یا رب کہ عمرِ خضر دراز
نہ ہو بہ ہرزہ، بیاباں نورد وہم وجود
ہنوز تیرے تصور میں ہے نشیب و فراز
وصال جلوہ تماشا ہے پر دماغ کہاں!
کہ دیجیے آئینۂِ انتظار کو پرواز
ہر ایک ذرۂِ عاشق ہے آفتاب پرست
گئی نہ خاک ہوئے پر ہوائے جلوۂِ ناز
نہ پوچھ وسعت مے خانۂِ جنوں غالب
جہاں یہ کاسۂِ گردوں ہے ایک خاک انداز
مفاعِلن فَعِلاتن مفاعِلن فَعِلن
مجتث مثمن مخبون محذوف