مرزا غالب

سیکھے ہیں مہ رخوں کے لیے ہم مصوری
تقریب کچھ تو بہرِ ملاقات چاہیے

حیدر علی آتش

جب کے رسوا ہوئے انکار ہے سچ بات میں کیا
اے صنم لطف ہے پردے کی ملاقات میں کیا
اب ملاقات ہوئی ہے تو ملاقات رہے
نہ ملاقات تھی جب تک کہ ملاقات نہ تھی
ابتدا سے تجھے موجود سمجھتا تھا میں
مرے تیرے کبھی پردے کی ملاقات نہ تھی
کیا کہوں اس کے جو مجھ پر کرم پنہاں تھے
ظاہری یار سے ہر چند ملاقات نہ تھی

مصحفی غلام ہمدانی

بحث اس کی میری وقت ملاقات بڑھ گئی
باتیں ہوئیں کچھ ایسی کہ بس بات بڑھ گئی
ان کو کیا ہووے ہے جز رزق پریشاں حاصل
جا بجا بوتے پھریں ہیں جو ملاقات کے بیج
یارب مری اس بت سے ملاقات کہیں ہو
جس بات کو جی چاہے ہے وہ بات کہیں ہو
اک ہم سے ہی ملنے میں تأمل ہے وگرنہ
غیروں سے وہی تیری ملاقات ہے اور تو
وہ در تلک آوے نہ کبھی بات کی ٹھہرے
حیراں ہوں میں کس طرح ملاقات کی ٹھہرے
وہ چاندنی رات اور وہ ملاقات کا عالم
کیا لطف میں گزرا ہے غرض رات کا عالم

فیض احمد فیض

پھر دمِ دید رہے چشم و نظر دید طلب
پھر شبِ وصل ملاقات نہ ہونے پائی

مرزا رفیع سودا

سوداؔ نہ مل کر اپنی تو اب زندگی پہ رحم
ہے اس جواں کی طرز ملاقات بے طرح

باقی صدیقی

سامنے بیٹھ کے ہر بات ہوئی
پھر بھی ان سے نہ ملاقات ہوئی

عبدالحمید عدم

اے رعشۂ مستی کا سبب پوچھنے والے
دیکھا ہے کبھی پہلی ملاقات کا عالم
اثر ہے تو یک لخت ہو گا نمایاں
کشش ہے تو فوراً ملاقات ہو گی
اللہ ترا حسن کرے اور زیادہ
ہم راہ نشینوں سے ملاقات کیے جا
بعض اوقات کسی اور کے ملنے سے عدمؔ
اپنی ہستی سے ملاقات بھی ہو جاتی ہے
ہے عرصۂ محشر بھی کوئی کنج گلستاں!
دیکھو تو کہاں ان سے ملاقات ہوئی ہے

عرفان صدیقی

جان لینے کا ویسا سلیقہ ابھی لشکرِ دشمناں میں کسی کو نہیں
آؤ اب اپنے خیموں میں واپس چلیں دوستوں سے ملاقات کرتے رہیں
ایسا تو نئیں کہ ان سے ملاقات نئیں ہوئی
جو بات میرے دل میں تھی وہ بات نئیں ہوئی
ناچیز بھی خوباں سے ملاقات میں گم ہے
مجذوب ذرا سیر مقامات میں گم ہے

مصطفی زیدی

کس طرح خود اپنے کو یقیں آئے کہ اس سے
ہم خاک نشینوں کی ملاقات رہی ہے

اختر شیرانی

اس مہ جبیں سے آج ملاقات ہو گئی
بے درد آسمان یہ کیا بات ہو گئی

بشیر بدر

نہ جی بھر کے دیکھا نہ کچھ بات کی
بڑی آرزو تھی ملاقات کی
جہاں وادیوں میں نئے پھول آئے
ہماری تمہاری ملاقات ہوگی
مسافر ہیں ہم بھی مسافر ہو تم بھی
کسی موڑ پر پھر ملاقات ہوگی

زہرا نگاہ

بہکے ہوئے بھٹکتے ہوئے کارواں کی خیر
رہبر سے راہزن کی ملاقات ہو گئی
لو ڈوبتوں نے دیکھ لیا ناخدا کو آج
تقریب کچھ تو بہرِ ملاقات ہو گئی

سدرشن فاکر

تجھ سے مل کر ہمیں رونا تھا بہت رونا تھا
تنگی وقت ملاقات نے رونے نہ دیا

ضیا جالندھری

جو سامنے ہوتا ہے کوئی اور ہے شاید
جو دل میں ہے اک خواب ملاقات وہ تم ہو

احمد راہی

زندگی کے وہ کسی موڑ پہ گاہے گاہے
مل تو جاتے ہیں ملاقات کہاں ہوتی ہے

تلوک چند محروم

کہتے ہیں عذر ہم کو ملاقات میں نہیں
ہم تجھ سے متفق مگر اک بات میں نہیں

حفیظ جالندھری

دیکھا جو کھا کے تیر کمیں گاہ کی طرف
اپنے ہی دوستوں سے ملاقات ہو گئی
یہ ملاقات ملاقات نہیں ہوتی ہے
بات ہوتی ہے مگر بات نہیں ہوتی ہے

سیف الدین سیف

اول اول تو بس ایک آہ نکل جاتی تھی
آخر۔۔ آخر تو ملاقات پہ رونا آیا
پہلی پہلی نظر کے افسانے
وہ ملاقات اور ہی کچھ تھی

شان الحق حقی

محفل میں وہ جب بہرِ ملاقات اٹھے ہیں
ہم راز سے کرتے ہوئے کچھ بات اٹھے ہیں

شکیل بدایونی

کیسے کہہ دوں کی ملاقات نہیں ہوتی ہے
روز ملتے ہیں مگر بات نہیں ہوتی ہے
بے تکلف ہوئی تجدید ملاقات مگر
وہ بھی اک تشنہ ملاقات سے آگے نہ بڑھی

کیف بھوپالی

کیفؔ کے بھولنے والے کو خبر ہو کہ اسے
صدمہ ترکِ ملاقات نے جینے نہ دیا

ناصر کاظمی

بیگانہ وار ان سے ملاقات ہو تو ہو
اب دور دور ہی سے کوئی بات ہو تو ہو
کیا جانوں کیوں الجھتے ہیں وہ بات بات پر
مقصد کچھ اس سے ترکِ ملاقات ہو تو ہو