امام بخش ناسخ

جب ہجر میں باغ کو گیا ہوں
میں آتشِ گل میں جل بجھا ہوں

حیدر علی آتش

رویا ہوں یاد کر کے میں تیری تند خوئی
صر صر نے جب چراغِ روشن بجھا دیے ہیں

باقی صدیقی

وضعداری کیا حقیقت راس آ سکتی نہیں
غم وہ شعلہ ہے جسے دنیا بجھا سکتی نہیں

جون ایلیا

جسم میں آگ لگا دوں اس کے
اور پھر خود ہی بجھا دوں اس کو

خواجہ میر درد

اطفائے نار عشق نہ ہو آب اشک سے
یہ آگ وہ نہیں جسے پانی بجھا سکے

قمر جلالوی

قمر وہ سب سے چھپ کر آ رہے ہیں فاتحہ پڑھنے
کہوں کس سے کہ میری شمعِ تربت اب بجھا دینا
مری زندگی ہی کیا ہے میں چراغِ رہگزر ہوں
جسے اک ہوا کا جھونکا ابھی آئے ابھی بجھا دے

عرفان صدیقی

آؤ تمہاری نذر کریں ہم ایک چراغ حکایت کا
جب تک جاگو روشن رکھنا نیند آئے تو بجھا دینا

مجید امجد

امیدِ دید دوست کی دنیا بسا کے ہم
بیٹھے ہیں مہر و ماہ کی شمعیں بجھا کے ہم

رئیس فروغؔ

دیے کے جلنے اور بجھنے کا بھید سمجھ میں آئے تو کیا
اسی ہوا سے جل بھی رہا تھا اسی ہوا سے بجھا بھی ہے

احسان دانش

کوئی کلیم اٹھے ورنہ انتظار کے بعد
چراغِ طور محبت بجھا رہا ہے کوئی

اختر شیرانی

شبِ وصل کی بے خودی چھا رہی ہے
کہو تو ستاروں کی شمعیں بجھا دیں

بشیر بدر

مرے ساتھ جگنو ہے ہم سفر مگر اس شرر کی بساط کیا
یہ چراغ کوئی چراغ ہے نہ جلا ہوا نہ بجھا ہوا

عبید اللہ علیم

تو دل میں بجھنے سی لگتی ہے کائنات تمام
کبھی کبھی جو مجھے تو بجھا سا لگتا ہے

حسرت موہانی

اب وہ ہجوم شوق کی سرمستیاں کہاں
مایوسی فراق نے دل ہی بجھا دیا

رسا چغتائی

رہنا ہر دم بجھا بجھا سا کچھ
ہو گیا دل کا مشغلہ سا کچھ

سیف الدین سیف

کیوں اجڑ جاتی ہے دل کی محفل
یہ دیا کون بجھا دیتا ہے

سیماب اکبر آبادی

اے خادمان حسن یہ کیا انتظام ہے
اب تک چراغِ طور پڑا ہے بجھا ہوا

شکیل بدایونی

میرے داغِ دل سے ہے روشنی اسی روشنی سے ہے زندگی
مجھے ڈر ہے اے مرے چارہ گر یہ چراغ تو ہی بجھا نہ دے

فانی بدایونی

گریۂ آتشیں کی داد دے شبِ غم تو کون دے
خودِ سرِ شام کیا بجھی شمع نے دل بجھا دیا

احمد فراز

وحشت کا سبب روزنِ زنداں تو نہیں ہے
مہر و مہ و انجم کو بجھا کیوں نہیں دیتے
عجیب آگ ہے چاہت کی آگ بھی کہ فراز
کہیں جلا نہیں کی اور کہیں بجھا نہیں کی

کلیم عاجز

تب و تاب عشق کا ہے کرم کہ جمی ہے محفل چشمِ نم
ذرا دیکھیو اے ہوائے غم یہ چراغ کوئی بجھا نہ دے

محسن نقوی

یہ تیرگی مرے گھر کا ہی کیوں مقدر ہو
میں تیرے شہر کے سارے دیے بجھا دوں گا
اس شب کے مقدر میں سحر ہی نہیں محسنؔ
دیکھا ہے کئی بار چراغوں کو بجھا کر

ناصر کاظمی

پھر سرِ صبح وہ قصہ چھیڑا
دن کی قندیل بجھا دی ہم نے