مرزا غالب

ہے خیالِ حسن میں حسن عمل کا سا خیال
خلد کا اک در ہے میری گور کے اندر کھلا

باقی صدیقی

کیا کیا رنگ بدلتا ہے
وحشی اپنے اندر کا
دل کے ملبے میں با جاتا ہوں
زلزلے کیا مرے اندر آئے
ہر صبح اٹھ کے زیست کی دیوار چاٹنا
باہر سے کتنا دور ہے اندر کا آدمی

جون ایلیا

کوئی دم بھی میں کب اندر رہا ہوں
لیے ہیں سانس اور باہر رہا ہوں
بہت دشوار ہو جائے گا جینا
یہاں تو ذات کے اندر نہ رہیو
باہر گزار دی کبھی اندر بھی آئیں گے
ہم سے یہ پوچھنا کبھی ہم گھر بھی آئیں گے
جانے کیا واقعہ ہوا کیوں لوگ
اپنے اندر نہیں رہے آباد
حملہ ہے چار سو در و دیوار شہر کا
سب جنگلوں کو شہر کے اندر سمیٹ لو
نہ پوچھ اس کی جو اپنے اندر چھپا
غنیمت کہ میں اپنے باہر چھپا
یہاں تیرے اندر نہیں میری خیر
مری جاں مجھے میرے اندر چھپا
میں اور خود کو تجھ سے چھپاؤں گا یعنی میں
لے دیکھ لے میاں مرے اندر بھی کچھ نہیں

عرفان صدیقی

سب نام دستِ ظلم تری دسترس میں ہیں
لیکن جو نام ہے مرے اندر لکھا ہوا
میں کوئی جگنو نہ تارا، میں کوئی سورج نہ چاند
اور تو دیکھے تو ہے مٹی کے اندر روشنی

مصطفیٰ زیدی

تابش حسن بھی تھی آتش دنیا بھی مگر
شعلہ جس نے مجھے پھونکا مرے اندر سے اٹھا

رئیس فروغؔ

داتا کے دربار تلک
اندر اندر جاؤں گا

بشیر بدر

بارشیں چھت پہ کھلی جگہوں پہ ہوتی ہیں مگر
غم وہ ساون ہے جو ان کمروں کے اندر برسے

غلام محمد قاصر

تری یاد کی برف باری کا موسم
سلگتا رہا دل کے اندر اکیلے
وعدے یخ بستہ کمروں کے اندر گرتے ہیں
میرے صحن میں جھلسے ہوئے کبوتر گرتے ہیں

ثروت حسین

اس مرد شفق فام نے اک اسم پڑھا اور
شہزادی کو دیوار کے اندر سے نکالا

سید ضمیر جعفری

باہر کوئی چیز نہیں
سارے ڈر اندر کے ہیں

اختر ہوشیارپوری

بجا کہ دشمن جاں شہر جاں کے باہر ہے
مگر میں اس کو کہوں کیا جو گھر کے اندر ہے

اکبر حمیدی

انہیں دیکھوں تو کیسے کیسے جذبے
مری آنکھوں کے اندر بولتے ہیں
میں صدیوں کے تفاخر کی زباں ہوں
زمانے میرے اندر بولتے ہیں

احمد فراز

خوش ہو نہ سر نوشتۂ مقتل کو دیکھ کر
فہرست ایک اور ہے اندر لگی ہوئی

اقبال ساجد

باہر سے دیکھیے تو بدن ہیں ہرے بھرے
لیکن لہو کا کال ہے اندر پڑا ہوا
جلتا ہے روز شام کو گھاٹی کے اس طرف
دن کا چراغ جھیل کے اندر پڑا ہوا
میں کہ باہر کی فضا میں قید تھا جس کے سبب
آج وہ خود جنس کے پنجرے کے اندر ہو گیا
کیسے ہو خد و خال سے پہچان ہماری
معنی کی طرح لفظ کے اندر بھی نہیں ہم

قتیل شفائی

شک ہو چلا تھا مجھ کو خود اپنی ہی ذات پر
جھانکا تو اپنے خول کے اندر بھی میں ہی تھا