مرزا غالب

کوئی میرے دل سے پوچھے ترے تیرِ نیم کش کو
یہ خلش کہاں سے ہوتی، جو جگر کے پار ہوتا

مرزا رفیع سودا

کن زخموں میں زخم ہے کہ جب تک
چھاتی کے نہ وار پار ہووے

یگانہ چنگیزی

وہ تیر کیا جو کسی کو نہ کر سکے بسمل
نگاہِ ناز وہ کیا ہے جو دل کے پار نہ ہو
اللٰہ رے توڑ نیچی نگاہوں کے تیر کا
اف بھی نہ کرنے پائے تھے اور دل کے پار تھا
ساحل کے پاس یاسؔ نے ہمت بھی ہار دی
کچھ ہاتھ پاؤں مارتا ظالم تو پار تھا

خواجہ میر درد

دریائے معرفت کے دیکھا تو ہم ہیں ساحل
گر وار ہیں تو ہم ہیں اور پار ہیں تو ہم ہیں

قمر جلالوی

رہا الم سے دلِ داغ دار کیا ہو گا
جو بیڑا ڈوب چکا ہو وہ پار کیا ہو گا

شکیب جلالی

اس فاصلوں کے دشت میں رہبر وہی بنے
جس کی نگاہ دیکھ لے صدیوں کے پار بھی

عرفان صدیقی

اور کچھ دن اس سے ملنے کے لیے جاتے رہو
بستیاں بس جائیں گی دریا کے پار اگلے برس

ادا جعفری

اک راہ رک گئی تو ٹھٹک کیوں گئیں اداؔ
آباد بستیاں ہیں پہاڑوں کے پار بھی

بیان میرٹھی

بلا ہے شوق شہادت نہ اس نے وار کیا
جگر کو آپ ہی بڑھ کر سناں کے پار کیا

ظہیر کاشمیری

کس کو ملی تسکین ساحل کس نے سر منجدھار کیا
اس طوفان سے گزرے جس نے ندی ندی کو پار کیا

غلام محمد قاصر

کل ہمہ تن جمال تھے آئنے حسبِ حال تھے
سنتے ہیں اب وہ خال و خد عکس کے پار بھی نہیں

فارغ بخاری

دیکھے کوئی جو چاکِ گریباں کے پار بھی
آئینۂ خزاں میں ہے عکس بہار بھی

ماجد صدیقی

کب سے دیتا ہے صدا کوئی پری وش ماجدؔ
عنبر و عود لٹاتے ہوئے اس پار ہمیں

اختر امام رضوی

اندھیری رات کی پرچھائیوں میں ڈوب گیا
سحر کی کھوج میں جو بھی افق کے پار گیا

ثروت حسین

سفینہ رکھتا ہوں درکار اک سمندر ہے
ہوائیں کہتی ہیں اس پار اک سمندر ہے

فانی بدایونی

تمییز حسن و عشق نہ عرفان غم مگر
اک تیر بے پناہ کلیجے کے پار ہے
مرے وجود کی حجت مرے عدم کی دلیل
وہ اک نظر تھی جو شاید جگر کے پار ہوئی

احمد فراز

یہ بے دلی ہے تو کشتی سے یار کیا اتریں
ادھر بھی کون ہے دریا کے پار کیا اتریں

امیر مینائی

جو نگاہ کی تھی ظالم تو پھر آنکھ کیوں چرائی
وہی تیر کیوں نہ مارا جو جگر کے پار ہوتا
اس کو دنیا کی اس کو خلد کی حرص
رند ہے کچھ نہ پارسا ہے کچھ

فراق گورکھپوری

دل سے ہے دور بھی نگاہ تری
دل کے اندر ہے دل کے پار بھی ہے

قتیل شفائی

لٹا جو اپنا گلستاں تو ہم نے یہ سمجھا
کوئی بہشت افق پار بھی نہیں باقی

محسن احسان

تم سرِ ساحل ڈبو بیٹھے ہو محسنؔ کشتیاں
جن سفینوں کو سمندر پار ہونا تھا ہوئے

محسن نقوی

مری دعا کو پلٹنا تھا پھر ادھر محسنؔ
بہت اجاڑ تھے منظر افق سے پار کے بھی