انشاء اللہ خان انشا

سی پارہائے دل کو رکھیو محافظت سے
اے میری جاں ہیں تیری حفظ حیات تیسوں

مصطفٰی خان شیفتہ

جب سے عطا ہوا ہمیں خلعت حیات کا
کچھ اور رنگ ڈھنگ ہوا کائنات کا
گر تیرے تشنہ کام کو دے خضر مرتے دم
پانی ہو خشک چشمۂِ آبِ حیات کا

باقی صدیقی

ترے حضور ہوں، فکر حیات ہے پھر بھی
مرے لبوں پہ زمانے کی بات ہے پھر بھی
مرے جنوں ہی نے بحث حیات چھیڑی تھی
مرے جنوں ہی پہ بحث حیات ختم ہوئی

جگر مراد آبادی

دل گیا رونق حیات گئی
غم گیا ساری کائنات گئی
قیدِ ہستی سے کب نجات جگرؔ
موت آئی اگر حیات گئی

سراج الدین ظفر

یا رب سراب اہلِ ہوس سے نجات دے
مجھ کو شراب دے انہیں آبِ حیات دے
اے دوست اس زمان و مکاں کے عذاب میں
دشمن ہے جو کسی کو دعائے حیات دے

عبدالحمید عدم

خیرات صرف اتنی ملی ہے حیات سے
پانی کی بوند جیسے عطا ہو فرات سے
حیات و موت کی غارت گری کا حال نہ پوچھ
جو موت نہ بن سکی وہ عدمؔ حیات ہوئی

قمر جلالوی

میں ڈھونڈ لوں تجھے میری بس کی بات کہاں
نہ جانے چھوڑ دے مجھ کو مری حیات کہاں

مجید امجد

تہہ خاک کرمکِ دانہ جو بھی شریکِ رقصِ حیات ہے
نہ بس ایک جلوۂ طور ہے ، نہ بس ایک شوقِ کلیم ہے
ہائے وہ لوگ، خوبصورت لوگ
جن کی دھن میں حیات گزری ہے
پھر کوئی آس لڑکھڑائی ہے
کہ نسیمِ حیات گزری ہے
گہرے سروں میں عرضِ نوائے حیات کر
سینے پہ ایک درد کی سل رکھ کے بات کر

الطاف حسین حالی

رنج کیا کیا ہیں ایک جان کے ساتھ
زندگی موت ہے حیات نہیں

جمال احسانی

کچھ اور زخم محبت میں بڑھ گئی ہے کسک
یہ سوچ کر کہ ابھی تو حیات باقی ہے

بشیر بدر

ذروں میں کنمناتی ہوئی کائنات ہوں
جو منتظر ہے جسموں کی میں وہ حیات ہوں
اندھے کنویں میں مار کے جو پھینک آئے تھے
ان بھائیوں سے کہیو ابھی تک حیات ہوں
آتی ہوئی ٹرین کے جو آگے رکھ گئی
اس ماں سے یہ نہ کہنا بقید حیات ہوں

عبید اللہ علیم

اب تو فراق صبح میں بجھنے لگی حیات
بار الٰہ کتنے پہر رہ گئی ہے رات

غلام محمد قاصر

شعر اک مشغلہ تھا قاصرؔ کا
اب یہی مقصد حیات بنا

سیف الدین سیف

یہ بھی ترے غم کا آسرا ہے
ہنستے ہیں غمِ حیات پر ہم

سلام مچھلی شہری

یہ ابر و باد یہ طوفان یہ اندھیری رات
اب ایک موڑ پہ آ جا رفیقِ راہ حیات

اقبال ساجد

جیوں گا اپنی مرضی سے مروں گا اپنی مرضی سے
مرے زیر تسلط ہے فنا اپنی حیات اپنی

فراق گورکھپوری

آنکھوں میں جو بات ہو گئی ہے
اک شرح حیات ہو گئی ہے
جس شے پہ نظر پڑی ہے تیری
تصویر حیات ہو گئی ہے
کیا جانیے موت پہلے کیا تھی
اب میری حیات ہو گئی ہے
اب دور آسماں ہے نہ دور حیات ہے
اے دردِ ہجر تو ہی بتا کتنی رات ہے
جینا جو آ گیا تو اجل بھی حیات ہے
اور یوں تو عمرِ خضر بھی کیا بے ثبات ہے
رکھ لی جنہوں نے کشمکش زندگی کی لاج
بے دردیاں نہ پوچھئے ان سے حیات کی
ہے عشق اس تبسم جاں بخش کا شہید
رنگینیاں لیے ہے جو صبح حیات کی
چھیڑا ہے دردِ عشق نے تار رگ عدم
صورت پکڑ چلی ہیں نوائیں حیات کی
سو درد اک تبسمِ پنہاں میں بند ہیں
تصویر ہوں فراقؔ نشاط حیات کی
دریا کے مد و جزر بھی پانی کے کھیل ہیں
ہستی ہی کے کرشمے ہیں کیا موت کیا حیات
مجھ کو تو غم نے فرصت غم بھی نہ دی فراقؔ
دے فرصت حیات نہ جیسے غمِ حیات
سنا تو ہے کہ کبھی بے نیاز غم تھی حیات
دلائی یاد نگاہوں نے تیری کب کی بات
زماں مکاں ہے فقط مد و جزر جوش حیات
بس ایک موج کی ہیں جھلکیاں قرار و ثبات
حیات بن گئی تھی جن میں ایک خواب حیات
ارے دوام و ابد تھے وہی تو کچھ لمحات
چمکتے درد کھلے چہرے مسکراتے اشک
سجائی جائے گی اب طرزِ نو سے بزم حیات
تری غزل تو نئی روح پھونک دیتی ہے
فراقؔ دیر سے چھوٹی ہوئی ہے نبض حیات