مرزا غالب

درخورِ قہر و غضب جب کوئی ہم سا نہ ہوا
پھر غلط کیا ہے کہ ہم سا کوئی پیدا نہ ہوا
حلقے ہیں چشم ہائے کشادہ بسوئے دل
ہر تارِ زلف کو نگہِ سرمہ سا کہوں
ہم بے خودی شوق میں کرلیتے ہیں سجدے
یہ ہم سے نہ پوچھو کہ کہاں ناصیہ سا ہیں
آئینہ کیوں نہ دوں کہ تماشا کہیں جسے
ایسا کہاں سے لاؤں کہ تجھ سا کہیں جسے
ہر مہینے میں جو یہ بدر سے ہوتا ہے ہلال
آستاں پر ترے مہ ناصیہ سا ہوتا ہے
خموشییوں میں تماشا ادا نکلتی ہے
نگاہ دل سے تری سرمہ سا نکلتی ہے

داغ دہلوی

کہاں نقش اول کہاں نقشِ ثانی
خدا کی خدائی میں تجھ سا نہ دیکھا

مصطفٰی خان شیفتہ

جوشِ فغاں وداع، کہ منظور ہے انہیں
دل نذرِ کاوشِ نگہِ سرما سا کروں

مومن خان مومن

تمہیں شورِ فغاں سے میرے کیا کام
خبر لو اپنی چشم سرمہ سا کی
رحم کر خصم جان غیر نہ ہو
سب کا دل ایک سا نہیں ہوتا
دیکھیے خاک میں ملاتی ہے
نگہِ چشمِ سرمہ سا کب تک
ہوئی بلبل ثنا خوان دہان تنگ کس گل کی
کہ فروردی میں غنچہ کا منہ اتنا سا نکل آیا

باقی صدیقی

دل ہے کچھ نا آشنا، کچھ آشنا
تو ہے یا اک شخص تجھ سا سامنے

قمر جلالوی

پڑھے گر لاکھ ماہِ چرخ تم سا ہو نہیں سکتا
یہ صورت ہو نہیں سکتی یہ نقشہ ہو نہیں سکتا

عرفان صدیقی

اذان ہے کہ علم کیا بلند ہوتا ہے
یہ جل رہا ہے ہوا میں چراغ سا کیسا

مجید امجد

ان گنت امروں میں اور کیا ہے ترے دل کے لیے
اک جیون ہار ڈر سا ہے ترے دل کے لیے

الطاف حسین حالی

وفا شرط الفت ہے لیکن کہاں تک؟
دل اپنا بھی تجھ سا ہوا چاہتا ہے

ادا جعفری

کانٹا سا جو چبھا تھا وہ لو دے گیا ہے کیا
گھلتا ہوا لہو میں یہ خورشید سا ہے کیا
آس کی میلی چادر اوڑھے
وہ بھی تھا مجھ سا کیا جانے

بشیر بدر

چمکنے والی ہے تحریر میری قسمت کی
کوئی چراغ کی لو کو ذرا سا کم کر دے
بے کار جی پہ بوجھ لئے پھر رہے ہو تم
دل ہے تمہارا پھول سا افسوس مت کرو

زہرا نگاہ

بات چیت میں جس کی روانی مثل ہوئی
ایک نام لیتے میں کچھ رک سا جاتا ہے

ضیا جالندھری

شگفتہ پھولوں کا گلدستہ صحبت یاراں
بکھرتے پتوں کا اک ڈھیر سا ہے تنہائی

عالم تاب تشنہ

زندگی محفلِ شب کی تھی پس انداز شراب
پینے بیٹھے تو بس اک گھونٹ ذرا سا نکلا

ماجد صدیقی

کاش! میں جس کے اوپر ہوں اک خوں سا
اپنے اندر کے اس شخص کو دیکھتا
جو سانس ہے تو یہی آس ہے کہ اب ماجدؔ
شبِ سیاہ کو بھی روپ چاند سا دوں گا

تلوک چند محروم

مانند ماہ اس کا فلک پر دماغ ہو
جھوٹوں بھی تاب حسن میں تم سا کہیں جسے

رسا چغتائی

گزر کس کا ہوا ہے جو ابھی تک
دو عالم آئنہ بردار سا ہے

سیماب اکبر آبادی

مابین نگاہ و جلوۂ حسن
ہے ایک حجاب سا تمنا

فانی بدایونی

دل کی کایا غم نے وہ پلٹی کہ تجھ سا بن گیا
درد میں دل ڈوب کر قطرے سے دریا بن گیا

احمد فراز

جس سمت بھی دیکھوں نظر آتا ہے کہ تم ہو
اے جانِ جہاں یہ کوئی تم سا ہے کہ تم ہو
وہ وقت نہ آئے کہ دلِ زار بھی سوچے
اس شہر میں تنہا کوئی ہم سا ہے کہ تم ہو
ہم کو اچھا نہیں لگتا کوئی ہم نام ترا
کوئی تجھ سا ہو تو پھر نام بھی تجھ سا رکھے

شاذ تمکنت

کوئی تجھ سا نہیں ہے انجمن در انجمن دیکھا
مگر تنہائیوں میں کوئی تجھ سا ہو ہی جاتا ہے

ناصر کاظمی

دائم آباد رہے گی دنیا
ہم نہ ہوں گے کوئی ہم سا ہو گا
خواب میں رات ہم نے کیا دیکھا
آنکھ کھلتے ہی چاند سا دیکھا
جو گھر اجڑ گئے ان کا نہ رنج کر پیارے
وہ چارہ کر کہ یہ گلشن اجاڑ سا نہ لگے
لوگ بھی سارے پتھر کے تھے
رنگ بھی ان کا پتھر سا تھا
چندر کرن سی انگلی انگلی
ناخن ناخن ہیرا سا تھا
گرد نے خیمہ تان لیا تھا
دھوپ کا شیشہ دھندلا سا تھا
اب میں سمجھا اب یاد آیا
تو اس دن کیوں چپ چپ سا تھا
ترے آنے کا دھوکا سا رہا ہے
دیا سا رات بھر جلتا رہا ہے
دیوانگی شوق کو یہ دھن ہے ان دنوں
گھر بھی ہو اور بے در و دیوار سا بھی ہو