مرزا غالب

غم اگر چہ جاں گسل ہے پہ کہاں بچیں کہ دل ہے
غمِ عشق گر نہ ہوتا، غمِ روزگار ہوتا
کم جانتے تھے ہم بھی غمِ عشق کو، پر اب
دیکھا تو کم ہوئے پہ غمِ روزگار تھا

داغ دہلوی

فلک سے طور قیامت کے بن نہ پڑتے تھے
اخیر اب تجھے آشوب روزگار کیا
آفتِ روزگار جب تم ہو
شکوۂِ روزگار کون کرے

مصحفی غلام ہمدانی

میرے گریے سے آب و تاب آیا
صورت روزگار پھر چمکی
اے مصحفیؔ اس میں چپ ہی رہ تو
سنتا ہے یہ روزگار ہے اور

مصطفٰی خان شیفتہ

تو روش یاب مہر و ماہ غلط
تو اداسنج روزگار نہیں
سب حوصلہ جو صرف ہوا جورِ یار کا
مجھ پر گلہ رہا ستمِ روزگار کا

مومن خان مومن

شکوۂِ دہر پر کہا تم کو
آفتِ روزگار ہونا تھا

فیض احمد فیض

دنیا نے تیری یاد سے بے گانہ کر دیا
تجھ سے بھی دلفریب ہیں غمِ روزگار کے
خیالِ یار، کبھی ذکرِ یار کرتے رہے
اسی متاع پہ ہم روزگار کرتے رہے

یگانہ چنگیزی

غضب کی دھوم شبستان روزگار میں ہے
کشش بلا کی تماشائے ناگوار میں ہے

باقی صدیقی

کسی لمحے پہ اپنا نام نہ تھا
گردش روزگار کو دیکھا
نظر کے سائے ذرا ہٹا لو کہ عقل کی سانس گھٹ رہی ہے
ہٹو ہٹو میں کشاکش روزگار پر غور کر رہا ہوں

جون ایلیا

تم نے ہم کو بھی کر دیا برباد
نادر روزگار تھے ہم تو

عبدالحمید عدم

تیری آنکھوں کے آسرے کے بغیر
کب غمِ روزگار اٹھتا ہے

مجید امجد

دن کٹ رہے ہیں کشمکشِ روزگار میں
دم گھٹ رہا ہے سایۂ ابرِ بہار میں
سوئے ہوئے سکوتِ چمن کو ذرا جگا
کچھ تو نوا طراز غمِ روزگار چھیڑ

بیان میرٹھی

بیاںؔ مرا دل خونیں وہ قطرہ ہے جس کو
محیط اعظم غم ہائے روزگار کیا

بیخود بدایونی

ہم تو جیتے ابھی مگر بیخودؔ
ستم روزگار نے مارا

علی سردار جعفری

افریقہ و ایشیا کی زینت
یہ نادر روزگار چہرے
بس اسی کو توڑنا ہے یہ جنون نفع خوری
یہی ایک سرد خنجر دل روزگار میں ہے

ماجد صدیقی

میں تیرے لیے ہوں مانتا ہوں
مجھ کو غمِ روزگار بھی ہے

تلوک چند محروم

آپ ہی مٹ مٹا کے ہم خاکِ رہ فنا ہوئے
اور مٹائے گی ہمیں گردش روزگار کیا

رسا چغتائی

میں پریشان حال آشفتہ
صورت رنگ روزگار رہا

سیماب اکبر آبادی

تم نے تو ہاتھ جور و ستم سے اٹھا لیا
اب کیا مزا رہا ستمِ روزگار میں
یادش بخیر یاد ہیں دل کی مصیبتیں
پہلو میں اک ستم زدۂ روزگار تھا

فانی بدایونی

باقی نہیں کسی کو نشاط جنوں کا ہوش
کس جوش پر شباب غمِ روزگار ہے
بساطِ عجز میں اک آہ تھی متاعِ حیات
سو وہ بھی صرف ستم ہائے روزگار ہوئی

احمد فراز

یہ سکون جاں کی گھڑی ڈھلے تو چراغِ دل ہی نہ بجھ چلے
وہ بلا سے ہو غمِ عشق یا غمِ روزگار کوئی تو ہو

فراق گورکھپوری

خلوت حسن و عشق بھی ہے اداس
سرد کچھ بزم‌ روزگار بھی ہے
اس میں لاکھوں نظامِ شمسی ہیں
یوں تو دل تیرہ روزگار بھی ہے

کلیم عاجز

جب صبا آئی ادھر ذکرِ بہار آ ہی گیا
یاد ہم کو انقلاب روزگار آ ہی گیا

ناصر کاظمی

پھر شامِ وصالِ یار آئی
بہلا غمِ روزگار کچھ دیر