انشاء اللہ خان انشا

ہنگامۂِ محشر بھی گر سامنے آیا تو
اس کو بھی تماشائی ایک سانگ نیا سمجھے

مصطفٰیٰ خان شیفتہ

شرماتے اس قدر رہے کیوں آپ رات کو
مدت سے گو ملے تھے مگر میں نیا نہ تھا

عرفان صدیقی

وہ خوش بدن ہے نویدِ بہار میرے لیے
میں اس کو چھولوں تو سب کچھ نیا نیا ہو جائے

الطاف حسین حالی

نور کے ہم نے گلے دیکھے ہیں اے حالیؔ مگر
رنگ کچھ تیری الاپوں میں نیا پاتے ہیں ہم

رئیس فروغؔ

سب اس کی باتیں گھسی پٹی ہیں
مگر وہ پیکر نیا نیا ہے
وہاں بدلی اوڑھ کے سو جانا
جہاں پانی آئے نیا میں

فارغ بخاری

کچھ اب کے بہاروں کا بھی انداز نیا ہے
ہر شاخ پہ غنچے کی جگہ زخم کھلا ہے

ماجد صدیقی

سموم عام کروں گا اسی کے ذروں سے
فضائے دہر کو اب پیرہن نیا دوں گا

ثروت حسین

یک بیک منظر ہستی کا نیا ہو جانا
دھوپ میں سرمئی مٹی کا ہرا ہو جانا

سیماب اکبر آبادی

روز اک دردِ تمنا سے نیا لیتے ہیں
ہم یونہی زندگی عشق بڑھا لیتے ہیں

اکبر حمیدی

ہر کہیں سچ ہی بولنا چاہے
شاید اکبرؔ نیا نیا ہے یہاں

قتیل شفائی

وضع داری سے ہے مجبور مرا پیار قتیلؔ
سب پرانے ہیں کوئی داغ نیا یاد نہیں

محسن نقوی

بہت دنوں سے مرا دل اداس ہے محسنؔ
اس آئنے کو کوئی عکس اب نیا دوں گا

ناصر کاظمی

اپنی بے چینی بھی عجب تھی
تیرا سفر بھی نیا نیا تھا
نئے دیس کا رنگ نیا تھا
دھرتی سے آکاش ملا تھا
دل کے لیے درد بھی روز نیا چاہیے
زندگی تو ہی بتا کیسے جیا چاہیے
نرم ہے برگِ سمن، گرم ہے میرا سخن
میری غزل کے لیے ظرف نیا چاہیے
ٹوٹے کبھی تو خواب شب و روز کا طلسم
اتنے ہجوم میں کوئی چہرہ نیا بھی ہو
رنج بھی دیکھے خوشی بھی دیکھی
آج کچھ درد نیا ہے دل میں