مرزا غالب

جاری تھی اسدؔ! داغِ جگر سے مری تحصیل
آ تشکدہ جاگیرِ سمندر نہ ہوا تھا
مرے قدح میں ہے صہبائے آتش پنہاں
بروئے سفرہ کبابِ دلِ سمندر کھینچ

امام بخش ناسخ

حال سوزِ غمِ فرقت کروں تحریر تو ہو
کبک کی چونچ قلم بال سمندر کاغذ

جون ایلیا

یہ دشتِ بے طرف ہے گمانوں کا موج خیز
اس میں سراب کیا کہ سمندر بھی آئیں گے

شکیب جلالی

جب تک رہی جگر میں لہو کی ذرا سی بوند
مٹھی میں اپنی بند سمندر لگا مجھے

عرفان صدیقی

اتنا بھی نہ کر طنز، تنگ ظرفی دل پر
قطرہ تھا، بہرحال سمندر تو نہیں تھا
صحرا کو شاد کام کیا اس کی موج نے
تھا سرنوشت میں جو سمندر لکھا ہوا
دل میں مرے یہ جوش ولا ہے خدا کی دین
حیرت نہ کر صدف میں سمندر کو دیکھ کر
ریت کی ہمسفری صرف کناروں تک ہے
اجنبی موجو، سمندر کی طرف لوٹ چلو
اک بادباں شکستہ جہاز اور چہار سمت
کالی گھٹا، سیاہ سمندر، علیؑ علیؑ
یہی ویرانہ بچا تھا تو خدا نے آخر
رکھ دیے دل میں مرے سات سمندر اپنے

مصطفی زیدی

بے صدف کتنے ہی دریاؤں سے کچھ بھی نہ ہوا
بوجھ قطرے کا تھا ایسا کہ سمندر سے اٹھا

جمال احسانی

آگاہ کیا ہوئے ہیں سرابوں سے ہم جمالؔ
سطحِ زمیں پہ کوئی سمندر نہیں رہا

بشیر بدر

آنکھوں میں رہا دل میں اتر کر نہیں دیکھا
کشتی کے مسافر نے سمندر نہیں دیکھا
آنسو کو کبھی اوس کا قطرہ نہ سمجھنا
ایسا تمہیں چاہت کا سمندر نہ ملے گا

عالم تاب تشنہ

اٹھتے ہوئے طوفان کا منظر نہیں دیکھا
دیکھو مجھے گر تم نے سمندر نہیں دیکھا

غلام محمد قاصر

پہچان رہی تھی مجھے ساحل پہ بچھی ریت
اک لہر چلی آئی سمندر سے نکل کر
کہیں بھی سرنگوں ہوتا نہیں اخلاص کا پرچم
جدائی کے جزیرے سے محبت کے سمندر تک
خوں کے یہ دھارے ہم نے پہلی بار نہیں دیکھے
لیکن اب ان دریاؤں میں سمندر گرتے ہیں

فارغ بخاری

دیکھ کر اس حسین پیکر کو
نشہ سا آ گیا سمندر کو
خشک پیڑوں میں جان پڑنے لگی
دیکھ کر روپ کے سمندر کو

ماجد صدیقی

اس نے بے سود ہی پتھر پھینکے
حوصلہ میرا سمندر نکلا

اختر امام رضوی

کم ظرف زمانے کی حقارت کا گلہ کیا
میں خوش ہوں مرا پیار سمندر کی طرح ہے

ثروت حسین

ہر رنگ میں اثبات سفر چاہئے ثروتؔ
مٹی پہ دھرو پاؤں سمندر سے نکل کر
جب شام ہوئی میں نے قدم گھر سے نکالا
ڈوبا ہوا خورشید سمندر سے نکالا

رسا چغتائی

اپنی بے چہرگی میں پتھر تھا
آئینہ بخت میں سمندر تھا
سر گزشت ہوا میں لکھا ہے
آسماں ریت کا سمندر تھا

اختر ہوشیارپوری

میں اس وسیع جزیرے میں واحد انساں ہوں
کہ میرے چاروں طرف دشت کا سمندر ہے

افضل منہاس

زندگی اتنی پریشاں ہے یہ سوچا بھی نہ تھا
اس کے اطراف میں شعلوں کا سمندر دیکھا
اتنی اہمیت کے قابل تو نہ تھا مٹی کا گھر
ایک نقطے میں سمٹ آیا سمندر کس لیے

اکبر حمیدی

ہوائیں ناچتی ہیں میرے سر پر
مرے خوں میں سمندر بولتے ہیں

احمد فراز

تھا جنہیں زعم وہ دریا بھی مجھی میں ڈوبے
میں کہ صحرا نظر آتا تھا سمندر نکلا
صرف آنسو ہی اگر دستِ کرم دیتا ہے
میری اجڑی ہوئی آنکھوں کو سمندر کر دے
تو بھی دل کو ایک خوں کی بوند سمجھا ہے فرازؔ
آنکھ اگر ہوتی تو قطرے میں سمندر دیکھتا
پھر بو رہا ہوں آج انہی ساحلوں پہ پھول
پھر جیسے موج میں یہ سمندر نہ آئے گا
برہم بس اس خطا پہ امیران شہر ہیں
ان جوہڑوں کو میں نے سمندر نہیں کہا
روتے ہو اک جزیرۂ جاں کو فرازؔ تم
دیکھو تو کتنے شہر سمندر کے ہو گئے

اقبال ساجد

پیاسے کے پاس رات سمندر پڑا ہوا
کروٹ بدل رہا تھا برابر پڑا ہوا
خشک اس کی ذات کا ساتوں سمندر ہو گیا
دھوپ کچھ ایسی پڑی وہ شخص بنجر ہو گیا
کیوں ہم سے پھر امید صدف باندھ رہے ہو
جب تم کو پتا ہے کہ سمندر بھی نہیں ہم

شاذ تمکنت

مانا کہ میرے ظرف سے بڑھ کر مجھے نہ دو
شبنم ہی مانگتا ہوں سمندر مجھے نہ دو
مجھے تو کرنی پڑی آبیاری صحرا
مگر نصیب میں تھی تشنگی سمندر کی

قتیل شفائی

گرتے ہیں سمندر میں بڑے شوق سے دریا
لیکن کسی دریا میں سمندر نہیں گرتا

کیف بھوپالی

اللہ تیرے ساتھ ہے ملاح کو نہ دیکھ
یہ ٹوٹی پھوٹی ناؤ سمندر میں ڈال دے

محسن احسان

اپنے اندر سے جو باہر نکلے
خود نمائی کا سمندر نکلے

محسن نقوی

مجھ سے مت پوچھ مری تشنہ لبی کے تیور
ریت چمکی تو یہ سمجھو کہ سمندر دیکھا
بھڑکائیں مری پیاس کو اکثر تری آنکھیں
صحرا مرا چہرا ہے سمندر تری آنکھیں