اگر شراب نہیں انتظارِ ساغر کھینچ
مرزا غالب
نفس نہ انجمن آرزو سے باہر کھینچ
اگر شراب نہیں انتظارِ ساغر کھینچ
’’کمال گرمی سعی تلاش دید‘‘ نہ پوچھ
بہ رنگِ خار مرے آئینہ سے جوہر کھینچ
تجھے بہانۂِ راحت ہے انتظار اے دل!
کیا ہے کس نے اشارہ کہ ناز بسترکھینچ
تری طرف ہے بہ حسرت نظارۂِ نرگس
بہ کوری دل و چشمِ رقیب ساغر کھینچ
بہ نیم غمزہ ادا کر حقِ ودیعتِ ناز
نیامِ پردۂِ زخمِ جگر سے خنجر کھینچ
مرے قدح میں ہے صہبائے آتش پنہاں
بروئے سفرہ کبابِ دلِ سمندر کھینچ