حیدر علی آتش

یار نے وعدۂِ فردائے قیامت تو کیا
شک ہے اے نالۂ دل تیری کرامات میں کیا

مصحفی غلام ہمدانی

شملہ رکھا جو دوش پہ لنگور کی سی دم
کیا اس میں شیخ جی کی کرامات بڑھ گئی

عبدالحمید عدم

منقلب صورت حالات بھی ہو جاتی ہے
دن بھلے ہوں تو کرامات بھی ہو جاتی ہے

عرفان صدیقی

ہمیشہ کاسۂ خالی چھلکتا رہتا ہے
فقیر ہوں سو کرامات کرتا رہتا ہوں
روح کے معجزوں کا زمانہ نہیں جسم ہی کچھ کرامات کرتے رہیں
اپنے ہونے کا اعلان کرتے رہیں‘ اپنے ہونے کا اثبات کرتے رہیں
ہم کون پیرِ دل زدگاں ہیں کہ عشق میں
یاراں بڑے بڑوں سے کرامات نئیں ہوئی

مصطفیٰ زیدی

صوفی کا خدا اور تھا شاعر کا خدا اور
تم ساتھ رہے ہو تو کرامات رہی ہے

اختر شیرانی

زاہد کو زندگی ہی میں کوثر چکھا دیا
رندوں سے آج یہ بھی کرامات ہو گئی

غلام محمد قاصر

ہر ایک شاخ پہ جب سانپ کا گماں گزرے
فقیر کشف و کرامات چھوڑ دیتے ہیں

حسرت موہانی

نگہِ یار سے پا لیتے ہیں دل کی باتیں
شہرت کشف و کرامات چلی جاتی ہے

حفیظ جالندھری

فکر تخلیق سخن مسند راحت پہ حفیظ
باعث کشف و کرامات نہیں ہوتی ہے

فراق گورکھپوری

وقت غروب آج کرامات ہو گئی
زلفوں کو اس نے کھول دیا رات ہو گئی
اہل وطن سے دور جدائی میں یار کی
صبر آ گیا فراقؔ کرامات ہو گئی

کلیم عاجز

دامن پہ کوئی چھینٹ نہ خنجر پہ کوئی داغ
تم قتل کرو ہو کہ کرامات کرو ہو

ناصر کاظمی

مشکل ہے پھر ملیں کبھی یاران رفتگاں
تقدیر ہی سے اب یہ کرامات ہو تو ہو