حیدر علی آتش

حقیقت دکھاتا تھا عشق مجازی
نہاں جس کو سمجھے ہوئے تھے عیاں تھا
خدا پنہاں ہے عالم آشکارا
نہاں ہے گنج ویرانہ عیاں ہے
انصاف کی ترازو میں تولا عیاں ہوا
یوسف سے تیرے حسن کا پلہ گراں ہوا
اس برق وش کا عشق نہانی عیاں ہوا
ابرِ سیاہ آہوں کا میرے دھواں ہوا
آئنہ سینۂِ صاحب نظراں ہے کہ جو تھا
چہرۂِ ِ شاہد مقصود عیاں ہے کہ جو تھا
نا فہمی کی دلیل ہے یہ سجدہ سے آیا
ابلیس کو حقیقت آدم عیاں نہ تھی

مصحفی غلام ہمدانی

تماشے کی شکلیں عیاں ہو گئی ہیں
بہاریں بہت یاں خزاں ہو گئی ہیں

مصطفٰیٰ خان شیفتہ

کہوں میں کیا کہ کیا دردِ نہاں ہے
تمہارے پوچھنے ہی سے عیاں ہے

میر مہدی مجروح

دیکھنے کی مجال ہے کس کو
مثلِ خورشید گو عیاں ہو تم

باقی صدیقی

تم نے تفسیر دو جہاں کی ہے
ورنہ یہ راز کب عیاں ہوتے
احساس سفر داغ سفر ن کے عیاں ہے
منزل پہ چراغ سرِ منزل کا دھواں ہے
فریاد کی اب کوئی ضرورت نہیں باقیؔ
اب حال مرا رنگ زمانہ سے عیاں ہے
اک خیال دنیا کاکر گیا سکوں برہم
اک ہوا کے جھونکے سے ہو گئے عیاں چہرے

جگر مراد آبادی

راز جو سینۂ فطرت میں نہاں ہوتا ہے
سب سے پہلے دل شاعر پہ عیاں ہوتا ہے

سراج الدین ظفر

وہ تماشا ہوں ہزاروں مرے آئینے ہیں
ایک آئینے سے مشکل ہے عیاں ہو جاؤں

قمر جلالوی

یہ نا ممکن ہو تیرا ستم مجھ سے عیاں کوئی
وہاں فریاد کرتا ہوں نہیں ہوتا جہاں کوئی

شکیب جلالی

غمِ الفت مرے چہرے سے عیاں کیوں نہ ہوا
آگ جب دل میں سلگتی تھی‘ دھواں کیوں نہ ہوا
تو وہی ہے جو مرے دل میں چھپا بیٹھا ہے
اک یہی راز کبھی مجھ پہ عیاں کیوں نہ ہوا

الطاف حسین حالی

وہ دن گئے کہ حوصلۂ ضبط راز تھا
چہرے سے اپنے شورش پنہاں عیاں ہے اب

ثروت حسین

کس پر پوشیدہ اور کس پہ عیاں ہونا تھا
کون ہوں میں مجھ کو اس وقت کہاں ہونا تھا

فانی بدایونی

عالم جز اعتبار نہاں و عیاں نہ تھا
یعنی کہ تو عیاں نہ ہوا اور نہاں نہ تھا

محسن احسان

کسی کے سامنے اظہار‌‌ درد جاں نہ کروں
ادھر ادھر کی کہوں زخمِ دل عیاں نہ کروں