مرزا غالب

ناگہاں اس رنگ سے خوں نابہ ٹپکانے لگا
دل کہ ذوقِ کاوشِ ناخن سے لذت یاب تھا
میں نامراد دل کی تسلی کو کیا کروں
مانا کہ تیری رخ سے نگہ کام یاب ہے

بہادر شاہ ظفر

تمہارے لب کے لب جام نے لیے بوسے
لب اپنے کاٹا کیا میں نہ کام یاب ہوا

داغ دہلوی

پیامی کام یاب آئے نہ آئے
خدا جانے جواب آئے نہ آئے

فیض احمد فیض

فیض تھی راہ سربسر منزل
ہم جہاں پہنچے ، کام یاب آئے

جون ایلیا

شیخ صاحب لیے پھریں تیغا
برہمن فتح یاب ہے سو ہے

جگر مراد آبادی

ہم نے ناکامیوں کو ڈھونڈ لیا
آخرش کام یاب ہونا تھا
اے حسنِ یار شرم یہ کیا انقلاب ہے
تجھ سے زیادہ درد ترا کام یاب ہے
وہ لاکھ سامنے ہوں مگر اس کا کیا علاج
دل مانتا نہیں کہ نظر کام یاب ہے
میں اس کا آئینہ ہوں وہ ہے میرا آئینہ
میری نظر سے اس کی نظر کام یاب ہے
خوب ہم جانتے ہیں اپنی قدر
تیرے نا کام یاب ہیں ہم لوگ
عشق کا سحر کام یاب ہوا
میں ترا تو مرا جواب ہوا
جذبۂ شوق کام یاب ہوا
آج مجھ سے انہیں حجاب ہوا
عشق بے امتیاز کے ہاتھوں
حسنِ خود بھی شکست یاب ہوا
ستم کام یاب نے مارا
کرم لا جواب نے مارا
لہو کی ہر اک بوند دل بن گئی ہے
خوشا لذت کام یاب محبت

قمر جلالوی

کلیم رحم تجلی کو آ گیا ہو گا
وگرنہ ذوقِ نظر کام یاب کیا ہوتا

اختر شیرانی

ہوں تیرے وصل سے مایوس اس قدر گویا
کبھی جہاں میں کوئی کام یاب ہو نہ سکا

اسرار الحق مجاز

حسن کو بے حجاب ہونا تھا
شوق کو کام یاب ہونا تھا
یہاں تو حسن کا دل بھی ہے غم سے صد پارہ
میں کام یاب نہیں وہ بھی کام یاب نہیں
مجازؔ کس کو میں سمجھاؤں کوئی کیا سمجھے
کہ کام یاب محبت بھی کام یاب نہیں

ثروت حسین

خود کلامی کے بھنور میں ڈوبتی پرچھائیں بن کر رہ گئے ہیں
اس اندھیری رات میں گھر سے نکلتے تو ستارہ یاب ہوتے

حسرت موہانی

قابلِ دید ہیں وصال کی شب
آرزو ہائے کام یاب کے رنگ

حفیظ جالندھری

وہ سر خوشی دے کہ زندگی کو شباب سے بہرہ یاب کر دے
مرے خیالوں میں رنگ بھر دے مرے لہو کو شراب کر دے
خلاف تقدیر کر رہا ہوں پھر ایک تقصیر کر رہا ہوں
پھر ایک تدبیر کر رہا ہوں خدا اگر کام یاب کر دے

سیماب اکبر آبادی

سکوں پذیر جنون شباب ہو نہ سکا
شگفت موسمِ گل کام یاب ہو نہ سکا

شاد عظیم آبادی

لاکھوں ہی مسافر چلتے ہیں منزل پہ پہنچتے ہیں دو ایک
اے اہلِ زمانہ قدر کرو نایاب نہ ہوں کم یاب ہیں ہم

شکیل بدایونی

مری نظریں مجھی کو رفتہ رفتہ بھول جاتی ہیں
ہوئے جاتے ہیں جلوے کام یاب آہستہ آہستہ
پھر وہی جہد مسلسل پھر وہی فکرِ معاش
منزلِ جاناں سے کوئی کام یاب آیا تو کیا
عشق کی تلخ کامیوں کے نثار
زندگی کام یاب کون کرے