حیدر علی آتش

عجب اس کا کیا نہ سماؤں میں جو خیال دشمن و دوست ہے
وہ مقام ہوں کہ گزر نہیں وہ مکان ہوں کہ پتا نہیں

شیخ ابراہیم ذوق

باغ عالم میں جہاں نخل حنا لگتا ہے
دل پر خوں کا وہاں ہاتھ پتا لگتا ہے
کشتۂِ زلف کے مرقد پہ تو اے لیلٰی وش
بید مجنوں ہی لگا تاکہ پتا یاد رہے
لوٹتے سیکڑوں نخچیر ہیں کیا یاد رہے
چیر دو سینے میں دل کو کہ پتا یاد رہے
قاصد عاشق سودا زدہ کیا لائے جواب
جب نہ معلوم ہو گھر اور نہ پتا یاد رہے
گور تک آئے تو چھاتی پہ قدم بھی رکھ دو
کوئی بیدل ادھر آئے تو پتا یاد رہے

مصحفی غلام ہمدانی

دلِ دیوانہ رات سے گم ہے
کہیں اس کا پتا نہیں ملتا

فیض احمد فیض

کچھ امتحانِ دستِ جفا کر چکے ہیں ہم
کچھ ان کی دسترس کا پتا کر چکے ہیں ہم
پیمانِ جنوں ہاتھوں کو شرمائے گا کب تک
دل والو! گریباں کا پتا کیوں نہیں دیتے

باقی صدیقی

لے گیا ساتھ اڑا کر باقیؔ
ایک سوکھا پتا ہم کو
یوں بھی ہونے کا پتا دیتے ہیں
اپنی زنجیر ہلا دیتے ہیں

جون ایلیا

کوئی مجھ تک پہنچ نہیں پاتا
اتنا آسان ہے پتا میرا
وہ بھی منزل تلک پہنچ جاتا
اس نے ڈھونڈا نہیں پتا میرا
گوشہ گیر غبار ذات ہوں میں
مجھ میں ہو کر مرا پتا مانگو

جگر مراد آبادی

وہ ہمارے قریب ہوتے ہیں
جب ہمارا پتا نہیں ہوتا

شکیب جلالی

نہ اتنی تیز چلے سر پھری ہوا سے کہو
شجر پہ ایک ہی پتا دکھائی دیتا ہے

عرفان صدیقی

رنگ آسان ہیں پہچان لیے جاتے ہیں
دیکھنے سے کہیں خوشبو کا پتا چلتا ہے
اس کو رہتا ہے ہمیشہ مری وحشت کا خیال
میرے گم گشتہ غزالوں کا پتا چاہتی ہے

مجید امجد

کسی خیال میں ہوں یا کسی خلا میں ہوں
کہاں ہوں، کوئی جہاں تو مرا پتا رکھتا

احسان دانش

ایسے ان جان بنے بیٹھے ہو
تم کو کچھ بھی نہ پتا ہو جیسے
خضر مشہور ہو الیاس بنے پھرتے ہو
کب سے ہم گم ہیں ہمارا تو پتا دو ہم کو
دانشؔ کو ضد ہے دیر و حرم بھی سہی مگر
کس کو ملا ہے ان کا پتا دیکھتے چلو

اکبر معصوم

اب تجھے میرا نام یاد نہیں
جب کہ تیرا پتا رہا ہوں میں

بشیر بدر

سر راہ کچھ بھی کہا نہیں کبھی اس کے گھر میں گیا نہیں
میں جنم جنم سے اسی کا ہوں اسے آج تک یہ پتا نہیں
اسی شہر میں کئی سال سے مرے کچھ قریبی عزیز ہیں
انہیں میری کوئی خبر نہیں مجھے ان کا کوئی پتا نہیں

سیف الدین سیف

تجھ سے پہلے دل بے تاب مجھے
تیری آمد کا پتا دیتا ہے

سیماب اکبر آبادی

اب کیا بتاؤں میں ترے ملنے سے کیا ملا
عرفان غم ہوا مجھے اپنا پتا ملا
کیا ڈھونڈنے جاؤں میں کسی کو
اپنا مجھے خود پتا نہیں ہے

فانی بدایونی

وہ نامراد اجل بزم یاس میں بھی نہیں
یہاں بھی فانیؔ آوارہ کا پتا نہ ملا

اختر ہوشیارپوری

ملا نہ تو تو غم زندگی کے دیوانے
ادھر ہی لوٹ پڑے میں تیرا پتا جو ہوا

شاذ تمکنت

آشنا کون ہے نقشِ قدم نکہت کا
یاد کس کو ہے ترے گھر کا پتا میری طرح

کلیم عاجز

یہی ہم نوا یہی ہم سخن یہی ہم نشاں یہی ہم وطن
مری شاعری ہی بتائے گی مرا نام کیا ہے پتا ہے کیا؟

کیفی اعظمی

بیلچے لاؤ کھولو زمیں کی تہیں
میں کہاں دفن ہوں کچھ پتا تو چلے