مرزا غالب

ہم تھے مرنے کو کھڑے ، پاس نہ آیا، نہ سہی
آخر اس شوخ کے ترکش میں کوئی تیر بھی تھا

امام بخش ناسخ

جائے دنداں لب سوفار ہوئے اے قاتل
دہن زخم سے ہو گا نہ ترا تیر جدا
کون تھا صید وفادار کہ اب تک صیاد
بال و پر اس کے ترے تیر لیے پھرتے ہیں

بہادر شاہ ظفر

گر کھنچے سینہ سے ناوک روح تو قالب سے کھینچ
اے اجل جب کھنچ گیا وہ تیر پھر کھینچی تو کیا
سہم کر اے ظفرؔ اس شوخ کماندار سے کہہ
کھینچ کر دیکھ مرے سینے سے تو تیر نہ توڑ

شیخ ابراہیم ذوق

نہ کھینچو عاشق تشنہ جگر کے تیر پہلو سے
نکالے پر ہے مثل ماہی تصویر پہلو سے
نہ لے اے ناوک افگن دل کو میرے چیر پہلو سے
کہ وہ تو جا چکا ساتھ آہ کے جوں تیر پہلو سے

مصحفی غلام ہمدانی

زخمی شکار ہوں میں ترا مر ہی جاؤں گا
پہلو سے مت جدا تو مرے تیر وصل کر

مصطفٰی خان شیفتہ

لکھتا ہوں جو میں آرزوئے قتل میں نامے
ہیں میرے کبوتر بھی ترے تیر کے مشتاق
اے ستم گر رگِ جاں میں ہے مری پیوستہ
دم نکل جائے گا سینے سے مرے تیر نہ کھینچ

یگانہ چنگیزی

نالوں نے زور باندھا ہے پھر پچھلی رات سے
اے چرخ چلتے چلتے کوئی تیر ہو نہ جائے

باقی صدیقی

کس سے پوچھیں کہ وہ اندازِ نظر
کب تبسم ہوا کب تیر ہوا
دیکھنا طرز پرسشِ احوال
بات کی بات اور تیر کا تیر

عبدالحمید عدم

زندگی کے حسین ترکش میں
کتنے بے رحم تیر ہوتے ہیں

قمر جلالوی

دل تڑپتا ہے تو پھر جاتی ہے موت آنکھوں میں
کس غضب کی خلش تیرِ نظر ہوتی ہے

مجید امجد

دیوارِ دل کے ساتھ بہ پیکانِ غم گڑے
آ دیکھ یہ ترے ہدفِ تیر کون ہیں

ضیا جالندھری

سوچ سمجھ سب سچ ہے لیکن دل کی بات ہے اور
دور تھی یوں تو آنکھ بھنور کی پہنچا تیر کے بیچ

حسرت موہانی

بھولی نہیں دل کو تری دزدیدہ نگاہی
پہلو میں ہے کچھ کچھ خلش تیر ابھی تک

فانی بدایونی

اس نگاہِ ناز کا اللہ رے فیض
نسبتیں ہیں زخمِ دل کو تیر سے

کیف بھوپالی

زخمِ جگر میں جھانک کے دیکھو
کیا یہ تمہارا تیر نہیں ہے

محسن احسان

کماں سے کیسی شکایت کہ وہ ہے نا بینا
ہدف کی بے نگہی تیر تک نہیں پہنچی