داغ دہلوی

ہوا ہے کیا ابھی ہنگامہ اور کچھ ہو گا
فغاں میں حشر کے آثار دیکھتے جاؤ

باقی صدیقی

اٹھ گئے بزم سے میخورا! نہیں کوئی نہیں
ہیں کہیں صبح کے آثار! نہیں کوئی نہیں
ظلم، ادبار، ہوس، وہم، عداوت، نفرت
ہیں کوئی جینے کے آثار! نہیں کوئی نہیں

جون ایلیا

یہ جو سنا اک دن وہ حویلی یکسر بے آثار گری
ہم جب بھی سائے میں بیٹھے دل پر اک دیوار گری

جگر مراد آبادی

وہ بھی ہوئے جاتے ہیں طرفدار محبت
اچھے نظر آتے نہیں آثار محبت
ناصح کو ہے کیوں میری محبت سے سروکار
چہرے سے تو کھلتے نہیں آثار محبت

قمر جلالوی

کس طرح گزری شبِ فرقت قمر سے یہ نہ پوچھ
رات بھر ڈھونڈا ہے تارہ صبح کے آثار کا

شکیب جلالی

دل میں لرزاں ہے ترا شعلہِ رخسار اب تک
میری منزل میں نہیں رات کے آثار اب تک

عرفان صدیقی

دفن کردی گئی جس خاک میں بستی میری
شہر اسی خاک سے آثار بھی کر سکتے ہیں
دیکھ لیتا ہے تو کھلتے چلے جاتے ہیں گلاب
میری مٹی کو خوش آثار کیا ہے اس نے
جنگل میں بھی بستی کے سے آثار نکل آئے
کس سمت رہا ہو کے گرفتار نکل آئے

مصطفی زیدی

ساری دنیا میں گھنی رات کا سناٹا تھا
صحنِ زنداں میں ملے صبح کے آثار مجھے

اختر حسین جعفری

پھر اس کے بعد طبنور و علم نا معتبر ٹھہرے
کوئی قاصد نہ اس شام شکست آثار تک آیا

ادا جعفری

ابھی تو سلسلہ اپنا زمیں سے آسماں تک تھا
ابھی دیکھا تھا راتوں کا سحر آثار ہو جانا

عبید اللہ علیم

یارب کوئی ستارۂ امید پھر طلوع
کیا ہو گئے زمین کے آثار دیکھنا

حسرت موہانی

نور عنقا ہے شبِ ہجر کی تاریکی میں
جلوۂ صبح کے آثار کہاں سے لاؤں

حفیظ ہوشیارپوری

یا صبح ہی سے شام کا پر کیف انتظار
یا شام ہی سے صبح کے آثار دیکھنا

سیف الدین سیف

صبح سے شام کے آثار نظر آنے لگے
پھر سہارے مجھے بے کارِ نظر آنے لگے

شکیل بدایونی

کشتی غیرت‌ احساس سلامت یا رب
آج طوفان کے آثار نظر آتے ہیں

فانی بدایونی

زندگی جبر ہے اور جبر کے آثار نہیں
ہائے اس قید کو زنجیر بھی درکار نہیں

احمد فراز

یوں تو پہلے بھی ہوئے اس سے کئی بار جدا
لیکن اب کے نظر آتے ہیں کچھ آثار جدا

محسن احسان

نئی صدی میں پرانی صدی کا سیلانی
گزشتہ عہد کے آثار ڈھونڈنے نکلا