مرزا غالب

اہلِ بینش نے بہ حیرت کدۂِ شوخی ناز
جوہر آئینہ کو طوطی بسمل باندھا
ہوائے سیرگل، آئینۂِ بے مہری قاتل
کہ اندازِ بخوں غلطیدن بسمل پسند آیا
لطفِ نظارۂِ قاتل دمِ بسمل آئے
جان جائے تو بلا سے ، پہ کہیں دل آئے

امام بخش ناسخ

اپنے ابرو آئنے میں دیکھ کر بسمل ہوا
کھینچ کر تلوار اپنا آپ وہ قاتل ہوا
بھاگ کر کب تجھ سے جاں بر کوئی اے قاتل ہوا
اڑ چلا گرِ ہوش اپنا طائر بسمل ہوا
اس ادا سے باڑھ دیکھی آپ نے تلوار کی
طائر رنگِ حنا بھی طائر بسمل ہوا
ہائے کس قاتل ادا سے کی شروع اس نے نماز
نکلی جب تکبیر اس کے منہ سے میں بسمل ہوا

بہادر شاہ ظفر

واں ارادہ آج اس قاتل کے دل میں اور ہے
اور یہاں کچھ آرزو بسمل کے دل میں اور ہے
منہ کھولے ہیں یہ زخم جو بسمل کے چار پانچ
پھر لیں گے بوسے خنجرِ قاتل کے چار پانچ

حیدر علی آتش

زخمِ کاری کی تری تیغ سے اللہ ری خوشی
رقص کرتا ہوا دنیا سے ہے بسمل جاتا

داغ دہلوی

زہے تقدیر کس آرام و راحت سے وہ بسمل ہے
کہ جس کے سر کا تکیہ دیر سے زانوئے قاتل ہے
تری تلوار کے قربان اے سفاک کیا کہنا
ادھر کشتے پہ کشتہ ہے ادھر بسمل پہ بسمل ہے
تا دمِ مرگ نہ ہو وہ مرے دشمن کو نصیب
جو مزا مجھ کو الٰہی دمِ بسمل آیا
یہاں تک تھک گئے ہیں چلتے چلتے تیرے ہاتھوں سے
کہ اب چھپ چھپ کے ناوک سینۂِ بسمل میں رہتے ہیں
کہیں ہے عید کی شادی کہیں ماتم ہے مقتل میں
کوئی قاتل سے ملتا ہے کوئی بسمل سے ملتا ہے
چھپائے سے کوئی چھپتی ہے اپنے دل کی بیتابی
کہ ہر تارِ نفس اپنا رگِ بسمل سے ملتا ہے

مصحفی غلام ہمدانی

کب خوں میں بھرا دامن قاتل نہیں معلوم
کس وقت یہ دل ہو گیا بسمل نہیں معلوم
نکلیں ہیں مرے دل کے تڑپنے میں ادائیں
ہے کس کی نگاہوں کا یہ بسمل نہیں معلوم
کرے گا یاد کیا قاتل کو اپنے
تڑپتا یاں سے جو بسمل گیا ہے
مری زباں کو مرا ہم نوا ہی سمجھے ہے
میں نیم ذبح ہوں بسمل سے بات کرتا ہوں
پہلو میں رہ گیا یوں یہ دل تڑپ تڑپ کر
رہ جائے جیسے کوئی بسمل تڑپ تڑپ کر

مصطفٰی خان شیفتہ

وہ با ادب شہید ہوں میرا جو نام لے
قاتل، تو پھر نہ ہو کسی بسمل کو اضطراب

مومن خان مومن

آغوش گور ہو گئی آخر لہولہان
آساں نہیں ہے آپ کے بسمل کو تھامنا

یگانہ چنگیزی

کھینچے لیے جاتا ہے کہیں شوقِ شہادت
دم لینے کی تاب اب دل بسمل نہیں رکھتا

جون ایلیا

اک زخم بھی یاران بسمل نہیں آنے کا
مقتل میں پڑے رہیے قاتل نہیں آنے کا

عرفان صدیقی

کس کو دیں قتل کا الزام بڑی مشکل ہے
جو بھی قاتل ہے ہماری ہی طرح بسمل ہے
قاتل سے لڑنا مشکل نہیں ہے
ممکن نہیں ہے بسمل نہ ہونا