مرزا غالب

آمد خط سے ہوا ہے سرد جو بازارِ دوست
دودِ شمعِ کشتہ تھا شاید خطِ رخسارِ دوست

حیدر علی آتش

نور تجلی ہے ترے رخسار کے لیے
آنکھیں مری کلیم ہیں دیدار کے لیے
حاجت نہیں بناؤ کی اے نازنیں تجھے
زیور ہے سادگی ترے رخسار کے لیے
گل سے جو سامنا ترے رخسار نے کیا
مژگاں نے وہ کیا کہ جو کچھ خار نے کیا
قامت تری دلیل قیامت کی ہو گئی
کام آفتاب حشر کا رخسار نے کیا
اعجاز کا عجب لب جاں بخش سے نہیں
پیغمبر اس کو مصحفِ رخسار نے کیا

داغ دہلوی

شبِ وصال عدو کی یہی نشانی ہے
نشان بوسۂِ رخسار دیکھتے جاؤ

مصحفی غلام ہمدانی

خورشید کا منہ ہے کہ طرف ہو سکے اس سے
یعنی وہ بر افروختہ رخسار غضب ہے
گو اس میں ہاتھا پائی بھی ہو جاوے ڈر نہیں
لوں گا میں اس کا بوسۂِ رخسار ہو سو ہو
احوال نپٹ تنگ ہے بیمار کا تیرے
اس وقت تو اے آئینہ رخسار کدھر ہے
جو جاں بہ لب ہو حسرتِ دیدار میں تری
دکھلا کے اس کو جلوۂِ رخسار مار ڈال

مصطفٰیٰ خان شیفتہ

جوش نگاہ دیدۂ حیراں کو کیا کہوں
ظاہر ہے روئے آئینہ رخسار سے حجاب

مومن خان مومن

دیتا ہوں اپنے لب کو بھی گلبرگ سے مثال
بوسے جو خواب میں ترے رخسار کے لیے

فیض احمد فیض

جانے کس رنگ میں تفسیر کریں اہلِ ہوس
مدحِ زلف و لب و رخسار کروں یا نہ کروں
شام گلنار ہوئی جاتی ہے دیکھو تو سہی
یہ جو نکلا ہے لیے مشعلِ رخسار، ہے کون

مرزا رفیع سودا

جو گل ہے یاں سو اس گل رخسار ساتھ ہے
کیا گل ہے وہ کہ جس کے یہ گل زار ساتھ ہے

جگر مراد آبادی

سب پھونک دیے خار و خس مذہب و ملت
اللٰہ رے یک شعلۂ رخسار محبت

شکیب جلالی

سرخی دامنِ گل کس کو میسر آئی؟
اپنے ہی خوں میں نہائے لب و رخسار یہاں
کوئی دیکھے تو سہی یار طرحدار کا شہر
میری آنکھوں میں سجا ہے لب و رخسار کا شہر
دل میں لرزاں ہے ترا شعلہِ رخسار اب تک
میری منزل میں نہیں رات کے آثار اب تک

عرفان صدیقی

اب آخرِ شب درد کا بھٹکا ہوا رہوار
آیا بھی تو شہرِ لب و رخسار میں آیا
جب یہ عالمِ ہو تو لکھیے لب و رخسار پہ خاک
اڑتی ہے خانۂ دل کے در و دیوار پہ خاک

مصطفیٰ زیدی

روکتا ہے غم اظہار سے پندار مجھے
میرے اشکوں سے چھپا لے مرے رخسار مجھے

جمال احسانی

فلک نے اس کو پالا تھا بڑے ناز و نعم سے
ستارہ جو ترے رخسار پر رکھا ہوا تھا

اختر شیرانی

چاندنی میں اے دل اک اک پھول سے
اپنے گل رخسار کی باتیں کریں
پھر مہک اٹھے فضائے زندگی
پھر گل و رخسار کی باتیں کریں

زہرا نگاہ

دل بجھنے لگا آتشِ رخسار کے ہوتے
تنہا نظر آتے ہیں غمِ یار کے ہوتے
خود آئینہ گر آئینہ چھوڑے تو نظر آئے
دہکا ہوا ہر شعلۂ رخسار بہت ہے

علی سردار جعفری

حسن کے چاند سے مکھڑے پہ چمکتے تارے
ہائے آنکھیں وہ حریف‌ لب و رخسار آنکھیں

حفیظ ہوشیارپوری

کیا دل فریب ہے ترے خوابِ گراں کا حسن
تجھ سے نہاں ترے لب و رخسار دیکھنا

سلام مچھلی شہری

درد آگیں ہی سہی بربط پس منظر بزم
نشہ ہائے لب و رخسار کو کیسے چھوڑوں

قتیل شفائی

احترام لب و رخسار تک آ پہنچے ہیں
بوالہوس بھی مرے معیار تک آ پہنچے ہیں
حکایات لب و رخسار سے آگے نہیں جاتے
وہ نغمے جو تمہارے پیار سے آگے نہیں جاتے

مجروح سلطان پوری

اب جا کے کچھ کھلا ہنر ناخن جنوں
زخمِ جگر ہوئے لب و رخسار کی طرح
سینے میں چھپ گیا ہے طلوعِ سحر کے ساتھ
اب شاخ دل پہ وہ گل رخسار دیکھیے
ان سے بچھڑے ہوئے مجروحؔ زمانہ گزرا
اب بھی ہونٹوں میں وہی گرمی رخسار سہی

محسن احسان

رہین مرگِ تمنا تھی کامرانی وصل
جھلس گیا ہے مجھے قرب شعلۂ رخسار

ناصر کاظمی

رنگ دکھلاتی ہے کیا کیا عمر کی رفتار بھی
بال چاندی ہو گئے سونا ہوے رخسار بھی