مرزا غالب

اے دلِ ناعاقبت اندیش! ضبطِ شوق کر
کون لا سکتا ہے تاب جلوۂِ دیدارِ دوست
تاکہ میں جانوں کہ ہے اس کی رسائی واں تلک
مجھ کو دیتا ہے پیامِ وعدۂِ دیدارِ دوست
کیوں جل گیا نہ، تابِ رخِ یار دیکھ کر
جلتا ہوں اپنی طاقتِ دیدار دیکھ کر
دل کو نیاز حسرتِ دیدار کر چکے
دیکھا تو ہم میں طاقتِ دیدار بھی نہیں
آنکھ کی تصویر سر نامے پہ کھینچی ہے کہ تا
تجھ پہ کھل جاوے کہ اس کو حسرتِ دیدار ہے

بہادر شاہ ظفر

وعدۂِ دیدار جو ٹھہرا قیامت پر تو یاں
روز ہوتی ہے قیامت شوق میں دیدار کے

حیدر علی آتش

اے صنم عاشق سے روپوشی نہیں لازم تجھے
پردہ موسیٰ سے نہیں اللہ کو دیدار کا
بوئے گل آتشؔ کہیں ہوتی ہے محسوس نظر
افزا ہے روزِ محشر یار کے دیدار کا
نا فہمی اپنی پردہ ہے دیدار کے لیے
ورنہ کوئی نقاب نہیں یار کے لیے
نور تجلی ہے ترے رخسار کے لیے
آنکھیں مری کلیم ہیں دیدار کے لیے
سیری نہ ہو گی تشنۂِ دیدار کے لیے
پانی نہیں چہ ذقن یار کے لیے
دو آنکھیں چہرے پر نہیں تیرے فقیر کے
دو ٹھیکرے ہیں بھیک کے دیدار کے لیے
بیمار تندرست ہو دیکھے جو روئے یار
کیا چاشنی ہے شربتِ دیدار کے لیے
الٹا ادھر نقاب تو پردے پڑے ادھر
آنکھوں کو بند جلوۂِ دیدار نے کیا
حسرت جلوۂِ دیدار لیے پھرتی ہے
پیش روزن پسِ دیوار لیے پھرتی ہے
ایک مدت سے رہ کعبہ میں آوارہ ہیں
کیا خدا کا مجھے دکھلائیں گے دیدار قدم
بیمارِ محبت تھا سوا اپنے نہ کوئی
اک مستحق شربتِ دیدار ہمیں تھے

داغ دہلوی

جلوہ کے بعد وصل کی خواہش ضرور تھی
وہ کیا رہا جو عاشق دیدار ہی رہا
آنکھیں کھلی ہوئی پسِ مرگ اس لیے
جانے کوئی کہ طالبِ دیدار مر گیا

مصحفی غلام ہمدانی

ترا شوقِ دیدار پیدا ہوا ہے
پھر اس دل کو آزار پیدا ہوا ہے
اے کاش یہ آنکھیں مجھے یہ دن نہ دکھاتیں
اس شوق پہ محرومی دیدار غضب ہے
از بہرِ خدا بام پر آ اے بتِ کافر
کوچے میں ترے طالبِ دیدار کھڑے ہیں
جب اس کی برقِ حسن سے پردہ ہوا ہے وا
ضائع ہوئے ہیں طالبِ دیدار ہر طرف
عاشق کو اس گلی سے نکالیں تھے جب بہ زور
پڑتی تھی چشم حسرتِ دیدار ہر طرف

مصطفٰی خان شیفتہ

تو ہے اور غیر کے گھر جلوہ طرازی کی ہوس
ہم ہیں اور حسرتِ دیدار ترے کوچے میں
وہ طعنہ زن ہے زندگیِ ہجر پر عبث
آتا ہے مجھ کو حسرتِ دیدار سے حجاب
یاس سے آنکھ بھی جھپکی تو توقع سے کھلی
صبح تک وعدۂِ دیدار نے سونے نہ دیا

مومن خان مومن

دل عشق تیری نذر کیا جان کیوں کہ دوں
رکھا ہے اس کو حسرتِ دیدار کے لیے

مرزا رفیع سودا

نرگس کی طرح خاک میری اگیں ہیں چشم
ٹک آن کے یہ حسرتِ دیدار دیکھنا
ہر آن دیکھتا ہوں میں اپنے صنم کو شیخ
تیرے خدا کا طالبِ دیدار کون ہے
پیغام اس نگہ کا کہ جس میں ہے بوئے مہر
کیا جانے کس کے آخری دیدار ساتھ ہے

جون ایلیا

اب تو ہے مدتوں سے شب و روز روبرو
کتنے ہی دن گزر گئے دیدار کو ترے

خواجہ میر درد

تیرا ہی حسن جگ میں ہر چند موجزن ہے
تس پر بھی تشنہ کام دیدار ہیں تو ہم ہیں

قمر جلالوی

چھوڑ کر گھر بار اپنا حسرتِ دیدار میں
اک تماشا بن کے آ بیٹھا ہوں کوئے یار میں

شکیب جلالی

وہ اجالے کا کوئی سیلِ رواں تھا، کیا تھا؟
میری آنکھوں میں ہے اک ساعتِ دیدار اب تک