مرزا غالب

فارغ مجھے نہ جان کہ مانند صبح و مہر
ہے داغ عشق، زینت جیب کفن ہنوز
غش آ گیا جو پس از قتل میرے قاتل کو
ہوئی ہے اس کو مری نعشِ بے کفن تکیہ
وقارِ ماتمِ شب زندہ دارِ ہجر رکھنا تھا
سپیدی صبحِ غم کی دوش پر رکھ کر کفن لائ

امام بخش ناسخ

برنگ زر کوئی کپڑوں میں آگ رہتی ہے
نہ میرے داغ چھپیں گے کفن کے پردے میں

انشاء اللہ خان انشا

تیور ایسے ہی ہلاکو ہیں جو کچھ بس ہو تو وہ
عکس آدم کو کریں گور و کفن آئینے میں

حیدر علی آتش

خلعت کی کیا امید رکھیں آسماں سے ہم
اس نے تو داب رکھا ہے اپنا کفن ہنوز
امانت کی طرح رکھا زمیں نے روزِ محشر تک
نہ اک مو کم ہوا اپنا نہ اک تار کفن بگڑا
شادی مرگ سے پھولا میں سمانے کا نہیں
گور کہتے ہیں کسے نام کفن ہے کس کا
غافل و ہشیار ہیں اس چشمِ مے گوں کے خراب
زندہ زیر پیرہن مردہ کفن میں مست ہے

شیخ ابراہیم ذوق

کوچے میں تیرے کون تھا لیتا بھلا خبر
شب چاندنی نے آ کے پہنایا کفن مجھے

مصحفی غلام ہمدانی

دل مایوس کو پہنے ہوئے آتی ہیں نظر
سیکڑوں حسرتِ دیدار کفن آئنے میں

قمر جلالوی

دیدار آخری پر روئے قمر وہ کیا کیا
یاد آئیں گی وفائیں منہ دیکھ کر کفن میں
لباس نو عدم والوں کو یوں احباب دیتے ہیں
کہ اب ان کے قیامت تک نہ جائیں گے کفن بدلے

احسان دانش

ہیں سامنے ہمارے روایات‌ کارزار
باندھے ہوئے ہیں سر سے مجاہد کفن ابھی
نظر کا فردِ عمل سے ہے سلسلہ درکار
یقیں نہ کر یہ سیاہی کفن چھپائے گا

احمد فراز

کبھی ان لالہ قباؤں کو بھی دیکھا ہے فراز
پہنے پھرتے ہیں جو خوابوں کے کفن تم جیسے

شاذ تمکنت

تھی داغ داغ مرے قاتلوں کی خوش پوشی
کہ عمر بھر مرے سر پر کفن ہی ایسا تھا

کیفی اعظمی

انساں کی خواہشوں کی کوئی انتہا نہیں
دو گز زمیں بھی چاہیے دو گز کفن کے بعد

مجروح سلطان پوری

سوئے مقتل کہ پئے سیرِ چمن جاتے ہیں
اہلِ دل جام بہ کف سر بہ کفن جاتے ہیں

محسن نقوی

ممکن ہو تو رہنے دے مجھے ظلمت جاں میں
ڈھونڈے گا کہاں چاندنی راتوں کا کفن تو
کہوں میں کس سے نشانی تھی کس مسیحا کی
وہ ایک زخم کہ محسنؔ مرے کفن میں کھلا

ناصر کاظمی

کس سے کہوں کوئی نہیں سو گئے شہر کے مکیں
کب سے پڑی ہے راہ میں میت شہرِ بے کفن