فیض احمد فیض

میری خاموشیوں میں لرزاں ہے
میرے نالوں کی گم شدہ آواز
سایہء چشم میں‌حیراں رخِ روشن کا جمال
سرخیء لب میں‌ پریشاں تری آواز کا رنگ

یگانہ چنگیزی

سامنے آ نہیں سکتے کہ حجاب آتا ہے
پردۂ دل سے سناتے ہیں وہ آواز مجھے
بے دھڑک آئے نہ زنداں میں نسیم وحشت
مست کر دیتی ہے زنجیر کی آواز مجھے

باقی صدیقی

تیرے قصوں نے پریشاں کر دیا
ہم نہتھے مانوس ہر آواز سے
گونج رہی ہے کانوں میں
اک سے ایک نئی آواز

عبدالحمید عدم

اب دو عالم سے صدائے ساز آتی ہے مجھے
دل کی آہٹ سے تری آواز آتی ہے مجھے
یا سماعت کا بھرم ہے یا کسی نغمے کی گونج
ایک پہچانی ہوئی آواز آتی ہے مجھے
کس نے کھولا ہے ہوا میں گیسوؤں کو ناز سے
نرم رو برسات کی آواز آتی ہے مجھے

قمر جلالوی

آہ کیا دل کے دھڑکنے کی جو آواز نہ ہو
نغمہ ہو جاتا ہے بے کیف اگر ساز نہ ہو
ساقیا جام ہے ٹوٹے گا صدا آئے گی
یہ مرا دل تو نہیں ہے کہ جو آواز نہ ہو

الطاف حسین حالی

کے ابھی تک کھلی نہیں لیکن
عیب سے آ رہی ہے کچھ آواز

اسرار الحق مجاز

سارا عالم گوش بر آواز ہے
آج کن ہاتھوں میں دل کا ساز ہے
تو جہاں ہے زمزمہ پرداز ہے
دل جہاں ہے گوش بر آواز ہے
چھپ گئے وہ سازِ ہستی چھیڑ کر
اب تو بس آواز ہی آواز ہے

عبید اللہ علیم

انسان ہو کسی بھی صدی کا کہیں کا ہو
یہ جب اٹھا ضمیر کی آواز سے اٹھا
تو اپنی آواز میں گم ہے میں اپنی آواز میں چپ
دونوں بیچ کھڑی ہے دنیا آئینۂ الفاظ میں چپ

جوش ملیح آبادی

کوئی آیا تری جھلک دیکھی
کوئی بولا سنی تری آواز
ہم سے کیا پوچھتے ہو ہم کیا ہیں
اک بیاباں میں گمشدہ آواز

شاد عظیم آبادی

نالہ آتا نہیں کن رس ہے فقط اے بلبل
مرد سیاح ہوں سن کر تری آواز آیا

عزیز حامد مدنی

گل کا وہ رخ بہار کے آغاز سے اٹھا
شعلہ سا عندلیب کی آواز سے اٹھا
یا رب تو لاج رکھ مرے شوقِ فضول کی
دنیا ہے نیند میں مری آواز سے اٹھا

اکبر حمیدی

کئی آوازوں کی آواز ہوں میں
غزل کے واسطے اعزاز ہوں میں
مری آواز میں صورت ہے میری
کہ اپنے ساز کی آواز ہوں میں

فراق گورکھپوری

کوئی پیغام محبت لب اعجاز تو دے
موت کی آنکھ بھی کھل جائے گی آواز تو دے
کان سے ہم تو فراقؔ آنکھ کا لیتے ہیں کام
آج چھپ کر کوئی آواز پر آواز تو دے
بڑھتے بھی جاتے ہیں سب اہلِ جہاں سوئے عدم
عمرِ رفتہ بھی دیے جاتی ہے آواز جدا
جو عدم کی جان ہے جو ہے پیام زندگی
اس سکوت راز اس آواز کی باتیں کرو

قابل اجمیری

جہان آرزو آواز ہی آواز ہوتا ہے
بڑی مشکل سے احساس شکست ساز ہوتا ہے
پگھل جاتی ہیں زنجیریں سلگ اٹھتی ہیں دیواریں
لبِ خاموش میں وہ شعلۂ آواز ہوتا ہے

قتیل شفائی

اے صحنِ چمن کے زندانی کر جشنِ طرب کی تیاری
بجتے ہیں بہاروں کے کنگن زنجیر کی یہ آواز نہیں

ناصر کاظمی

بسا ہوا ہے خیالوں میں کوئی پیکرِ ناز
بلا رہی ہے ابھی تک وہ دلنشیں آواز
یہ اور بات کہ دنیا نہ سن سکی ورنہ
سکوت اہلِ نظر ہے بجائے خود آواز
عروج پر ہے مرا درد ان دنوں ناصر
مری غزل میں دھڑکتی ہے وقت کی آواز

نوح ناروی

ہر صدائے عشق میں اک راز ہے
نالۂ دل غیب کی آواز ہے
عشق نے دل کو پکارا اس طرح
میں یہ سمجھا آپ کی آواز ہے
حسن کے جلووں کو اپنے دل میں دیکھ
لن ترانی دور کی آواز ہے