فیض احمد فیض

بام مینا سے ماہتاب اترے
دستِ ساقی میں، آفتاب آئے

مرزا رفیع سودا

چہرے پہ نہ یہ نقاب دیکھا
پردے میں تھا آفتاب دیکھا

میر انیس

کبھی برا نہیں جانا کسی کو اپنے سوا
ہر ایک ذرے کو ہم آفتاب سمجھے ہیں

جگر مراد آبادی

اپنے حدود سے نہ بڑھے کوئی عشق میں
جو ذرہ جس جگہ ہے وہیں آفتاب ہے
عشق میں لا جواب ہیں ہم لوگ
ماہتاب آفتاب ہیں ہم لوگ
شام سے آ گئے جو پینے پر
صبح تک آفتاب ہیں ہم لوگ
عرق آلود چہرۂ ِ تاباں
شبنم و آفتاب کا عالم
دل ذرہ ذرہ ہے طور تجلی
زہے جلوۂ آفتاب محبت

سراج الدین ظفر

ہو گی مرے سبو سے نمود ہزار صبح
ابھریں گے اس افق سے ابھی آفتاب اور

عبدالحمید عدم

داغ سا ماہتاب میں پایا
زخم سا آفتاب میں دیکھا

قمر جلالوی

جلوے ہوئے نہ جذب رخِ بے نقاب میں
کرنیں سمٹ کے آ نہ سکیں آفتاب میں
پسِ نقاب رخِ لاجواب کیا ہوتا
ذرا سے ابر میں گم آفتاب کیا ہوتا

شکیب جلالی

یوں آئنہ بدست ملی پربتوں کی برف
شرما کے دھوپ لوٹ گئی آفتاب میں

عرفان صدیقی

نہ ہو گا کیا کبھی اس کے بدن کا چاند طلوع
لہو میں اترا ہوا آفتاب کتنا ہے

احسان دانش

خیال دوست تری جلوہ تابیوں کی قسم
جو تو نہ تھا مری دنیا میں آفتاب نہ تھا
ازل کے دن سے ہیں ہم مست جلوۂ ساقی
ہمارے سامنے کس روز آفتاب نہ تھا
جو رنگ بانٹ کے جاتا ہے تنکے تنکے کو
عدو زمیں کا یہی آفتاب نکلے گا
جب رخ حسن سے نقاب اٹھا
بن کے ہر ذرہ آفتاب اٹھا

اختر شیرانی

بسے ہوئے ہیں نگاہوں میں وہ حسیں کوچے
ہر ایک ذرہ جہاں کم ز آفتاب نہیں
اگر وہ اپنے حسین چہرے کو بھول کر بے نقاب کر دے
تو ذرے کو ماہتاب اور ماہتاب کو آفتاب کر دے
فضائے شب ہنس کے جگمگائی وہ نازنیں صبح بن کے آئی
ہوا ہے روشن مرے شبستاں میں چاند سے آفتاب پہلے
نگاہ فیض سے محروم برتری معلوم
ستارہ چمکا مگر آفتاب ہو نہ سکا
مرے دماغ کی دنیا کا آفتاب ہے یہ
ملا کے برف میں یہ آفتاب پینے دے

اسرار الحق مجاز

تیرے جلووں میں گھر گیا آخر
ذرے کو آفتاب ہونا تھا
یہ ماہتاب نہیں ہے کہ آفتاب نہیں
سبھی ہے حسن مگر عشق کا جواب نہیں
نہ پوچھئے مری دنیا کو میری دنیا میں
خود آفتاب بھی ذرہ ہے آفتاب نہیں

بشیر بدر

مری نظر میں رہے ڈوبنے کا منظر بھی
غروب ہوتا ہوا آفتاب دے جاؤ

ظہیر کاشمیری

سوچا تو اس حبیب کو پایا قریب جاں
دیکھا تو آستیں میں چھپا آفتاب تھا
دل بھی صنم پرست نظر بھی صنم پرست
اس عاشقی میں خانہ ہمہ آفتاب تھا

جلیل مانک پوری

نگاہ برق نہیں چہرہ آفتاب نہیں
وہ آدمی ہے مگر دیکھنے کی تاب نہیں
وصالِ یار بھی ہے دور میں شراب بھی ہے
قمر بھی ہے مرے پہلو میں آفتاب بھی ہے

جوش ملیح آبادی

میں رو رہا ہوں تیری نظر ہے عتاب کی
شبنم کو پی رہی ہے کرن آفتاب کی
ہر پنکھڑی کے طاق میں ہنس ہنس کے صبح کو
شمعیں جلا رہی ہے کرن آفتاب کی

حفیظ جالندھری

حقیقتیں آشکار کر دے صداقتیں بے حجاب کر دے
ہر ایک ذرہ یہ کہہ رہا ہے کہ آ مجھے آفتاب کر دے

شکیل بدایونی

تشنۂ انوار ہے اب تک عروس زندگی
بادلوں کی پالکی میں آفتاب آیا تو کیا
اجالے گرمیِ رفتار کا ہی ساتھ دیتے ہیں
بسیرا تھا جہاں اپنا وہیں تک آفتاب آیا

فانی بدایونی

خانۂ تصویر میں آنے کو ہے تصویر یار
آئنے میں قدِ آدم آفتاب آنے کو ہے

امیر مینائی

شبِ فراق میں کیوں یارب انقلاب نہ تھا
یہ آسمان نہ تھا یا یہ آفتاب نہ تھا
جا پائی خط نے اس کے رخِ بے نقاب میں
سورج گہن پڑا شرفِ آفتاب میں
دامن بھرا ہوا تھا جو اپنا شراب میں
محشر کے دن بٹھائے گئے آفتاب میں
رکھا یہ تم نے پائے حنائی رکاب میں
یا پھول بھر دیے طبقِ آفتاب میں
چاہے جو حفظِ جان تو نہ کر اقربا سے قطع
کب سوکھتے ہیں برگِ شجر آفتاب میں
سرکتی جائے ہے رخ سے نقاب آہستہ آہستہ
نکلتا آ رہا ہے آفتاب آہستہ آہستہ

شاذ تمکنت

میں شاذؔ کیا کہوں کیا روشنی تھی راہوں میں
وہ آفتاب نہ تھا آفتاب جیسا تھا

فراق گورکھپوری

چڑھا کے ساغرِ مے جگمگا اٹھے چہرے
سمٹ کے آ گئی سینوں میں آفتاب کی آنچ