مرزا رفیع سودا

رخصت ہے باغباں کہ تنک دیکھ لیں چمن
جاتے ہیں واں جہاں سے پھر آیا نہ جائے گا

باقی صدیقی

گھر کو یوں دیکھ رہے ہیں جیسے
آج ہی گھر نظر آیا ہم کو
خوشی ہے دے فریب زندگانی
کہ تجھ پر اعتبار آیا ہوا ہے
دلوں میں فاصلہ اتنا نہیں ہے
زمانہ درمیاں آیا ہوا ہے
رہبر کا طلسم جب ٹوٹا
یاد ایک ایک ہم سفر آیا
حسن گلشن میں فرق کیا آیا
اک کھلا پھول، ایک مرجھایا

عبدالحمید عدم

تاکہ دنیا کی دل کشی نہ گھٹے
نت نئے پیرہن میں آیا کرو

قمر جلالوی

ڈھونڈنے پر بھی نہ دل پایا گیا
سوچتا ہوں کون کون آیا گیا

عرفان صدیقی

جس نے میری ہی طرف تیر چلایا میں تھا
اور جو اس تیر سے بچ کر نکل آیا میں تھا

الطاف حسین حالی

نامہ بر آج بھی خط لے کے نہ آیا یارو
تم تو کہتے ہو کہ وہ ہے ابھی آیا جاتا

بشیر بدر

کہاں سے آئی یہ خوشبو یہ گھر کی خوشبو ہے
اس اجنبی کے اندھیرے میں کون آیا ہے

غلام محمد قاصر

بیاباں دور تک میں نے سجایا تھا
مگر وہ شہر کے رستے سے آیا تھا

فارغ بخاری

میں کہ اب تیری ہی دیوار کا اک سایا ہوں
کتنے بے خواب دریچوں سے گزر آیا ہوں
تری صباحت صد رنگ میں بکھر جاؤں
ابھی وہ لمحہ مری زندگی میں آیا نہیں

جوش ملیح آبادی

بے ہوش ہو کے جلد تجھے ہوش آ گیا
میں بد نصیب ہوش میں آیا نہیں ہنوز

شاد عظیم آبادی

ہوں اس کوچے کے ہر ذرے سے آگاہ
ادھر سے مدتوں آیا گیا ہوں

شکیل بدایونی

بے وجہِ انتظار دکھانے سے فائدہ
کہہ دیجیے کہ سامنے آیا نہ جائے گا
ستم اپنے جو یاد آیا کریں گے
تو دل ہی دل میں پچھتایا کریں گے

قابل اجمیری

تضاد جذبات میں یہ نازک مقام آیا تو کیا کرو گے
میں رو رہا ہوں تم ہنس رہے ہو میں مسکرایا تو کیا کرو گے
مجھے تو اس درجہ وقت رخصت سکوں کی تلقین کر رہے ہو
مگر کچھ اپنے لیے بھی سوچا میں یاد آیا تو کیا کرو گے
ابھی تو تنقید ہو رہی ہے مرے مذاق جنوں پہ لیکن
تمہاری زلفوں کی برہمی کا سوال آیا تو کیا کرو گے
اتر تو سکتے ہو یار لیکن مآل پر بھی نگاہ کر لو
خدا ناکردہ سکون ساحل نہ راس آیا تو کیا کرو گے

قتیل شفائی

دور تک چھائے تھے بادل اور کہیں سایہ نہ تھا
اس طرح برسات کا موسم کبھی آیا نہ تھا
اب کھلا جھونکوں کے پیچھے چل رہی تھیں آندھیاں
اب جو منظر ہے وہ پہلے تو نظر آیا نہ تھا
یہ بات پھر مجھے سورج بتانے آیا ہے
ازل سے میرے تعاقب میں میرا سایا ہے
وہ جس کے نین ہیں گہرے سمندروں جیسے
وہ اپنی ذات میں مجھ کو ڈبونے آیا ہے
کوئی مقام سکوں راستے میں آیا نہیں
ہزار پیڑ ہیں لیکن کہیں بھی سایا نہیں
کسے پکارے کوئی آہٹوں کے صحرا میں
یہاں کبھی کوئی چہرہ نظر تو آیا نہیں
زیست کی گرمی بیدار بھی لایا سورج
کھل گئی آنکھ مری سر پہ جو آیا سورج
پھر شعاعوں نے مرے جسم پہ دستک دی ہے
پھر جگانے مرے احساس کو آیا سورج
شام کو روٹھ گیا تھا مجھے تڑپانے کو
صبح دم آپ مجھے ڈھونڈنے آیا سورج
ڈالتے اس پہ کمندیں وہ کوئی چاند نہ تھا
سو جتن سب نے کیے ہاتھ نہ آیا سورج
لوگ کہتے رہے سورج کو دکھائیں گے چراغ
اور ہی رنگ تھا جب سامنے آیا سورج

کیف بھوپالی

دلِ ناداں نہ دھڑک اے دلِ ناداں نہ دھڑک
کوئی خط لے کے پڑوسی کے گھر آیا ہو گا
کھیلنے کے لیے بچے نکل آئے ہوں گے
چاند اب اس کی گلی میں اتر آیا ہو گا
کون آئے گا یہاں کوئی نہ آیا ہو گا
میرا دروازہ ہواؤں نے ہلایا ہو گا

کیفی اعظمی

شور یوں ہی نہ پرندوں نے مچایا ہو گا
کوئی جنگل کی طرف شہر سے آیا ہو گا
اپنے جنگل سے جو گھبرا کے اڑے تھے پیاسے
ہر سراب ان کو سمندر نظر آیا ہو گا

میرا جی

بجائے دل اک تلخ آنسو رہے گا
اگر ان کی محفل میں آیا گیا دل

ناصر کاظمی

تو جب میرے گھر آیا تھا
میں اک سپنا دیکھ رہا تھا
نکہت و نور کو رخصت کرنے
بادل دور تلک آیا تھا
رات کی طوفانی بارش میں
تو مجھ سے ملنے آیا تھا
تو جب دو بارہ آیا تھا
میں ترا رستہ دیکھ رہا تھا
میں ترے شہر سے پھر گزرا تھا
پچھلے سفر کا دھیان آیا تھا
میں اس شہر میں کیوں آیا تھا
میرا کون یہاں رہتا تھا
فکر یہ تھی کہ شبِ ہجر کٹے گی کیوں کر
لطف یہ ہے کہ ہمیں یاد نہ آیا کوئی
شہر میں ہمدمِ دیرینہ بہت تھے ناصر
وقت پڑنے پہ مرے کام نہ آیا کوئی