مرزا رفیع سودا

دل دار اس کو خواہ دل آزار کچھ کہو
سنتا نہیں کسو کی مرا یار کچھ کہو
گر تجھ میں ہے وفا تو جفاکار کون ہے
دل دار تو ہوا تو دل آزار کون ہے
کرتے تو ہو مرے مرض دل کا تم علاج
یارو جو دل یہی ہے تو آزار ساتھ ہے

جون ایلیا

مت سنو مجھ سے جو آزار اٹھانے ہوں گے
اب کے آزار یہ پھیلا ہے کہ آزار نہیں
اب وہ حالت ہے کہ تھک کر میں خدا ہو جاؤں
کوئی دل دار نہیں کوئی دل آزار نہیں
ذکر گل ہو خار کی باتیں کریں
لذت و آزار کی باتیں کریں

جگر مراد آبادی

توہین نگاہِ کرم یار کہاں تک
دم لینے دے اے لذتِ آزار محبت

عرفان صدیقی

دو چار حرف لکھ کے ہم اپنے گمان میں
اس کو شریکِ لذتِ آزار کرتے ہیں
میں تو اک درد کا سرمایہ لیے بیٹھا ہوں
یہ مری جان کا آزار ہے میں کیا جانوں
یہ کوئی طنز نہیں تیری مسیحائی پر
عشق کیا جان کا آزار ہے خاکم بدہن
زخم کھانا ہی جو ٹھہرا تو بدن تیرا ہے
خوف کا نام مگر لذتِ آزار نہ رکھ
جگر کے پار نہیں تیرِ نیم کش اس کا
عجب عدوئے کم آزار سے معاملہ ہے

الطاف حسین حالی

حق ہوا کس سے ادا اس کی وفاداری کا
جس کے نزدیک جفا باعث آزار نہیں

ادا جعفری

اچانک دل ربا موسم کا دل آزار ہو جانا
دعا آساں نہیں رہنا سخن دشوار ہو جانا
اک خواب کا احساں بھی اٹھائے نہیں اٹھتا
کیا کہیے کہ آسودۂ آزار بہت ہیں
کیوں اہلِ وفا زحمت بیداد نگاہی
جینے کے لیے اور بھی آزار بہت ہیں
تھے خضر بھی لاکھوں یہاں عیسیٰ بھی بہت تھے
آزار جو دل کا ہے سو آزار چلے ہے

عبید اللہ علیم

یہ سجا سجایا گھر ساتھی مری ذات نہیں مرا حال نہیں
اے کاش کبھی تم جان سکو جو اس سکھ نے آزار دیا
میں روتا ہوں اور آسمان سے تارے ٹوٹتے دیکھتا ہوں
ان لوگوں پر جن لوگوں نے مرے لوگوں کو آزار دیا

ماجد صدیقی

تھا میسر ہی نہ پیرایۂ اظہار ہمیں
ورنہ اس شہر میں کیا کیا تھے نہ آزار ہمیں

حسرت موہانی

بدل لذتِ آزار کہاں سے لاؤں
اب تجھے اے ستمِ یار کہاں سے لاؤں

رسا چغتائی

ہم نے تو اس عشق میں یارو کھینچے ہیں آزار بہت
تم کچھ اس کی بات کرو ہے جس سے تم کو پیار بہت

سیف الدین سیف

غمِ جاناں کی اذیت غمِ دنیا کا عذاب
زندگی میں نے گزاری بڑے آزار کے ساتھ

سیماب اکبر آبادی

یہ دنیائے وفا دنیائے بے آزار ہو جائے
مجھی پر کیوں نہ تکمیل جفائے یار ہو جائے

فانی بدایونی

ہاں ابھی بے خبر لذتِ آزار ہیں ہم
مژدہ اے مشقِ ستم تازہ گرفتار ہیں ہم
یہ طرفہ ستم ہے کہ ستم بھی ہے کرم بھی
اب خوگر آزار ہوا بھی نہیں جاتا

احمد فراز

تم ہو نا خوش تو یہاں کون ہے خوش پھر بھی فرازؔ
لوگ رہتے ہیں اسی شہرِ دل آزار کے بیچ
وحشتیں بڑھتی گئیں ہجر کے آزار کے ساتھ
اب تو ہم بات بھی کرتے نہیں غم خوار کے ساتھ
ہم نے اک عمر بسر کی ہے غمِ یار کے ساتھ
میرؔ دو دن نہ جیے ہجر کے آزار کے ساتھ
اک چارہ گر ہے اور ٹھکانے کا ہے فراز
دنیا ہمارے در پئے آزار ہی سہی
زندگی تھی کہ قیامت تھی کہ فرقت تیری
ایک اک سانس نے وہ وہ دیے آزار کہ بس
ہوئے جاتے ہیں کیوں غم خوار قاتل
نہ تھے اتنے بھی دل آزار قاتل
یہ طبیعت ہے تو خود آزار بن جائیں گے ہم
چارہ گر روئیں گے اور غم خوار بن جائیں گے ہم
عشق آغاز میں ہلکی سی خلش رکھتا ہے
بعد میں سیکڑوں آزار سے لگ جاتے ہیں
چلو کہ کوچۂ دلدار چل کے دیکھتے ہیں
کسے کسے ہے یہ آزار چل کے دیکھتے ہیں
بہت سے ایسے ستم گر تھے اب جو یاد نہیں
کسی حبیب دل آزار کے علاوہ بھی
ہمیں بھی کارِ جہاں لے گیا ہے دور بہت
رہا ہے در پئے آزار اب کہاں تو بھی

قتیل شفائی

تم اس کو برے نام سے یارو نہ پکارو
یہ نام اسے باعث آزار ہی کب تھا

کیف بھوپالی

وہ زلفیں سانپ ہیں بے شک اگر زنجیر بن جائیں
محبت زہر ہے بے شک اگر آزار ہو جائے

محسن احسان

ظلم وہ ظلم اجل ڈھونڈتی پھرتی ہے پنہ
صبر وہ صبر کہ شرمندہ ہے آزار کہ بس