یگانہ چنگیزی

دم بھر میں اب مریض کا قصہ تمام ہے
کیونکر کہوں یہ رات کٹے گی فسانے میں

باقی صدیقی

تبصرہ تھا مرے فسانے پر
تان ٹوٹی شراب خانے پر
وقت ہو تو حضور سن لیجے
آخری باب ہے فسانے کا

جون ایلیا

جو اپنے طور سے ہم نے کبھی گزارے تھے
وہ صبح و شام تو جیسے فسانے ہو گئے ہیں

عبدالحمید عدم

وہ باتیں تری وہ فسانے ترے
شگفتہ شگفتہ بہانے ترے
عدمؔ بھی ہے تیرا حکایت کدہ
کہاں تک گئے ہیں فسانے ترے

قمر جلالوی

اوراقِ گلِ تر جو کبھی کھولے صبا نے
تحریر تھے لاکھوں مری وحشت کے فسانے
سرخیاں کیا ڈھونڈ کر لاؤں فسانے کے لیے
بس تمھارا نام کافی زمانے کے لیے

اختر شیرانی

جس کا ہر لفظ ہے سراپا غم
میں ہوں عنوان اس فسانے کا
اے دل وہ عاشقی کے فسانے کدھر گئے
وہ عمر کیا ہوئی وہ زمانے کدھر گئے

اکبر معصوم

رہ جائے گی یہ ساری کہانی یہیں دھری
اک روز جب میں اپنے فسانے میں جاؤں گا

بشیر بدر

ہونٹوں پہ محبت کے فسانے نہیں آتے
ساحل پہ سمندر کے خزانے نہیں آتے

غلام محمد قاصر

ہم نے تمہارے غم کو حقیقت بنا دیا
تم نے ہمارے غم کے فسانے بنائے ہیں

ماجد صدیقی

پھول کہو یا دل کے فسانے
حرف لکھے کچھ، بادِ صبا نے

حفیظ جالندھری

نسخۂ ہستی میں عبرت کے سوا کیا تھا حفیظؔ
سرخیاں کچھ مل گئیں اپنے فسانے کے لیے

سیف الدین سیف

جلوۂ جاناں کی تفسیریں
ایک حقیقت لاکھ فسانے
نفس نفس متغیر ہے داستانِ حیات
قدم قدم پہ فسانے بدلتے رہتے ہیں

شان الحق حقی

وہ مزا رکھتے ہیں کچھ تازہ فسانے اپنے
بھولتے جاتے ہیں سب درد پرانے اپنے

شکیل بدایونی

آدمی نہ اتنا بھی دور ہو زمانے سے
صبح کو جدا سمجھے شام کے فسانے سے
غمِ جہاں کے فسانے تلاش کرتے ہیں
یہ فتنہ گر تو بہانے تلاش کرتے ہیں

فانی بدایونی

ہماری موت نے کچھ مختصر کیا ورنہ
کچھ انتہا ہی نہ تھی عشق کے فسانے کی
نہ پوچھئے کہ محبت میں مجھ پہ کیا گزری
نہ چھیڑیے مرے بھولے ہوئے فسانے کو

احمد فراز

خلق کی بے خبری ہے کہ مری رسوائی
لوگ مجھ کو ہی سناتے ہیں فسانے میرے
ہم نہ ہوتے تو کسی اور کے چرچے ہوتے
خلقت شہر تو کہنے کو فسانے مانگے

فراق گورکھپوری

فراقؔ دوڑ گئی روح سی زمانے میں
کہاں کا درد بھرا تھا مرے فسانے میں
کسی کی حالتِ دل سن کے اٹھ گئیں آنکھیں
کہ جان پڑ گئی حسرت بھرے فسانے میں
داستان زندگی بھی کس قدر دلچسپ ہے
جو ازل سے چھڑ گیا ہے اس فسانے کی کہو

کیف بھوپالی

ایک ہم ہی نہیں پھرتے ہیں لیے قصۂ غم
ان کے خاموش لبوں پر بھی فسانے سے ملے

ناصر کاظمی

آنکھوں میں ہیں دکھ بھرے فسانے
رونے کے پھر آ گئے زمانے