یگانہ چنگیزی

دور اتنی نہ کبھی کھنچتی عدم کی منزل
کاش کچھ نقشِ قدم ہی کا سہارا ہوتا

باقی صدیقی

کبھی ہر موج قدم لیتی ہے
کبھی تنکے کا سہارا بھی نہیں
زندگی لے گئی طوفانوں میں
دے کے تنکے کا سہارا ہم کو
جب گھیر کے بے کسی نے مارا
کوئی بھی نہ دے سکا سہارا
ہوتی ہے قدم قدم پہ لغزش
ملتا ہے کہیں کہیں سہارا

قمر جلالوی

نزع کے عالم میں قاصد لے کے جب آیا جواب
ڈوبنے والوں کو تنکے کا سہارا ہو گیا

عرفان صدیقی

رکنا ہو یا چلنا ہو، کوئی فکر نہیں بنجارے کو
بنجارن نئے چھپر چھائے ، کوچ میں پوت سہارا دے

الطاف حسین حالی

دیکھ اے امید کہ جو، ہم سے نہ تو کنارا
تیرا ہی رہ گیا ہے لے دے کے اک سہارا

رئیس فروغؔ

وہ اک ہجوم تھا گرتے ہوئے درختوں کا
پکارتے تھے سہارا ملے سہارا ملے

احسان دانش

دل پھر چلا ہے لے کے ترے آستاں کی سمت
اپنی شکستگی کا سہارا لیے ہوئے

اختر شیرانی

کچھ تو تنہائی کی راتوں میں سہارا ہوتا
تم نہ ہوتے نہ سہی ذکر تمہارا ہوتا

غلام محمد قاصر

سوچا ہے تمہاری آنکھوں سے اب میں ان کو ملوا ہی دوں
کچھ خواب جو ڈھونڈتے پھرتے ہیں جینے کا سہارا آنکھوں میں

فارغ بخاری

جبیں کا چاند بنوں آنکھ کا ستارا بنوں
کسی جمال شفق تاب کا سہارا بنوں

سیماب اکبر آبادی

پہلے مرے سہارے پہ تھا کار و بار زیست
اب میں ہوں زندگی کا سہارا لیے ہوئے

شاد عظیم آبادی

اب جوانی کی امنگیں نہ امنگوں کی خوشی
شادؔ کو ہے فقط اے موج سہارا تیرا

شکیل بدایونی

وہ اگر برا نہ مانیں تو جہانِ رنگ و بو میں
میں سکونِ دل کی خاطر کوئی ڈھونڈ لوں سہارا
پہلو میں دردِ عشق کی دنیا لیے ہوئے
بیٹھا ہوں زندگی کا سہارا لیے ہوئے
میں جی رہا ہوں غم کدۂ روزگار میں
تیری محبتوں کا سہارا لیے ہوئے
اٹھتا ہوں بزمِ حسن سے لغزش بپا شکیلؔ
بہکی سی اک نظر کا سہارا لیے ہوئے

فانی بدایونی

لے اعتبار وعدۂ فردا نہیں رہا
اب یہ بھی زندگی کا سہارا نہیں رہا
یہ دردِ محبت غمِ دنیا تو نہیں ہے
اب موت بھی جینے کا سہارا نہ رہے گی

فراق گورکھپوری

دور آغاز جفا دل کا سہارا نکلا
حوصلہ کچھ نہ ہمارا نہ تمہارا نکلا

قتیل شفائی

یہ دل ذرا سا دل تری یادوں میں کھو گیا
ذرے کو آندھیوں کا سہارا ہے ان دنوں

مجروح سلطان پوری

کوئی ہم دم نہ رہا کوئی سہارا نہ رہا
ہم کسی کے نہ رہے کوئی ہمارا نہ رہا

محسن نقوی

موج در موج الجھنے کی ہوس بے معنی
ڈوبتا ہو تو سہارا نہیں دیکھا جاتا