مرزا غالب

لطف جب ہو کہ کروں غیر کو بھی میں بدنام
کہیے کیا حکم ہے سرکار! کروں یا نہ کروں

حیدر علی آتش

اے شاہ حسن زلف و رخ و گوش چشم و لب
کیا کیا علاقے ہیں تری سرکار کے لیے

داغ دہلوی

سر اڑاتے ہیں وہ تلواروں سے
کوئی کہتا نہیں سرکار یہ کیا
تم آئینہ ہی نہ ہر بار دیکھتے جاؤ
مری طرف بھی تو سرکار دیکھتے جاؤ

عبدالحمید عدم

گرتے ہیں لوگ گرمیِ بازار دیکھ کر
سرکار دیکھ کر مری سرکار دیکھ کر

قمر جلالوی

حکم بے سوچے جو سرکار دیے دیتے ہیں
کیوں مجھے جرأتِ گفتار دیے دیتے ہیں

شکیب جلالی

مسکراتے رہیں سینے کے دہکتے ہوئے داغ
دائم آباد رہے درد کی سرکار کا شہر

عرفان صدیقی

یہ بھی دیکھو کہ کہاں کون بلاتا ہے تمہیں
محضرِ شوق پڑھو‘ محضرِ سرکار پہ خاک
تو فرستادۂ سرکار نہیں ہے نہ سہی
ہاتھ میں محضرِ سرکار ہے میں کیا جانوں
پھر ہم پہ ستم ہو کہ پئے حلقۂ یاراں
کچھ حیلۂ مداحیِ سرکار نکل آئے

الطاف حسین حالی

ہے ادب مسند پہ، جو کچھ ہے رئیس شہر
ہٹ کے مسند سے جو خود دیکھیں تو ہیں سرکار ہیچ

احمد راہی

عام ہے کوچہ و بازار میں سرکار کی بات
اب سر راہ بھی ہوتی ہے سر دار کی بات

ماجد صدیقی

زندگی ہم سے ماجدؔ گریزاں تو تھی
جرم اپنا بھی کچھ اس میں سرکار تھا

جلیل مانک پوری

جان دینے کی اجازت دیجیے
سر مرا سرکار کے قابل نہیں

سیف الدین سیف

مری خوددار طبیعت نے بچایا مجھ کو
میرا رشتہ کسی دربار نہ سرکار کے ساتھ

شکیل بدایونی

روزِ روشن میں اگر ان کو دکھاؤ تارے
وہ یہ کہہ دیں گے کہ سرکار نظر آتے ہیں

احمد فراز

ہم ہیں خاموش کہ مجبور محبت تھے فرازؔ
ورنہ منسوب ہیں سرکار سے باتیں کیا کیا
انکار نہ اقرار بڑی دیر سے چپ ہیں
کیا بات ہے سرکار بڑی دیر سے چپ ہیں

قتیل شفائی

جو حقائق تھے وہ اشکوں سے ہم آغوش ہوئے
جو فسانے تھے وہ سرکار تک آ پہنچے ہیں

کیف بھوپالی

محبت سے تمہیں سرکار کہتے ہیں وگرنہ ہم
نگاہیں ڈال دیں جس پر وہی سرکار ہو جائے