مرزا غالب

زہر ملتا ہی نہیں مجھ کو ستمگر، ورنہ
کیا قسم ہے ترے ملنے کی کہ کھا بھی نہ سکوں

انشاء اللہ خان انشا

کر کے جھوٹا نہ دیا جام اگر تو نے تو چل
مارے غیرت کے ہم افیون تو کھا سکتے ہیں

حیدر علی آتش

کعبے سے دیر دیر سے کعبے کو جا چکے
کیا کیا نہ اس دوراہے میں ہم پھیر کھا چکے

داغ دہلوی

اپنے غم میں بھی اس کو صرفہ ہے
نہ کھلا جانے وہ نہ کھا جانے

مصحفی غلام ہمدانی

جاتے ہیں کوچے میں ہم اس کے تو واں غیر کو دیکھ
پھر نہ آنے کی قسم کھا کے چلے آتے ہیں
غیر جب وصل کا کرتا ہے سوال ان سے تو وے
کیسے محجوب ہو دم کھا کے چلے آتے ہیں
ہے غیر سے بھی ربط تمہیں میں جو یہ کہا
سوگند میرے سر کی وہ کھا کر چلے گئے
کیا ہم نے معلوم نظروں سے تیری
کہ نظریں تری ہم کو کھا کر رہیں گی

مومن خان مومن

مجلس میں اس نے پان دیا اپنے ہاتھ سے
اغیار سبز بخت تھے ہم زہر کھا گئے
کیا پوچھتا ہے تلخی الفت میں پند کو
ایسی تو لذتیں ہیں کہ تو جان کھا گیا

جون ایلیا

تعجب ہے کہ عشق و عاشقی سے
ابھی کچھ لوگ دھوکا کھا رہے ہیں
اب ببر شیر اشتہا ہے مری
شاعروں کو تو کھا چکا ہوں میں

جگر مراد آبادی

ہمارے ہی دل سے مزے ان کے پوچھو
وہ دھوکے جو دانستہ ہم کھا رہے ہیں
مری تباہی دل پر تو رحم کھا نہ سکے
جو روشنی میں رہے روشنی کو پا نہ سکے

خواجہ میر درد

پی گئی کتنوں کا لوہو تیری یاد
غم ترا کتنے کلیجے کھا گیا

سراج الدین ظفر

تو بھی دیار دوست میں شوق کے زمزمے الاپ
بادِ شمال کی طرح ٹھوکریں کھا کے بھول جا

عبدالحمید عدم

مطلب معاملات کا کچھ پا گیا ہوں میں
ہنس کر فریب چشمِ کرم کھا گیا ہوں میں
سو بار لغزشوں کی قسم کھا کے چھوڑ دی
سو بار چھوڑنے کی قسم کھا کے پی گیا

قمر جلالوی

سرِ شام تجھ سے ملنے ترے در پہ آ گئے ہیں
یہ وہیں ہیں لوگ شاید جو فریب کھا گئے ہیں

مجید امجد

کس کو خبر کہ ڈوبتے لمحوں سے کس طرح
ابھرے ہیں یاد یار، تری چوٹ کھا کے ہم